Затрыманы былы дырэктар ДФР КДК Анатоль Грамовіч
Былы дырэктар дэпартамента фінансавых расследаванняў Камітэта дзяржкантролю затрыманы ў межах «справы «Белгазпрамбанка». Пра гэта БелаПАН паведаміў прэс-сакратар КДК Кірыл Данілаў.
«Так, мы пацвярджаем гэта затрыманне, – сказаў ён. – Сапраўды, затрыманы ў межах расследавання крымінальнай справы ў дачыненні да былых і цяперашніх работнікаў банка. Пакуль гэта ўся інфармацыя».
Грамовіч узначальваў ДФР са студзеня 2002 да лістапада 2006 года. Ён затрымліваўся і раней – у студзені 2009 года. Слуханне справы пачалося 21 мая 2010 года, пасяджэнні праводзіліся ў закрытым фармаце. Да крымінальнай адказнасці былі прыцягнутыя 36 чалавек, большасць з якіх з’яўляліся службовымі асобамі мытні «Заходні Буг» (у тым ліку два намеснікі начальніка мытні і начальнік паста) і ўпраўлення КДБ па Берасцейскай вобласці (былыя намеснік начальніка ўпраўлення, а таксама начальнік аддзела па барацьбе з арганізаванай злачыннасцю і карупцыяй). Паводле ацэнак следства, ад нявыплаты мытных плацяжоў дзяржаве былі нанесеныя страты памерам звыш 30 млрд рублёў.
У выніку Беларускі ваенны суд 15 лістапада 2011 года прыняў рашэнне спыніць справаводства па крымінальнай справе ў дачыненні да дзевяці фігурантаў з-за адсутнасці ў іх дзеяннях складу злачынства. Гэтыя людзі мелі права на поўную рэабілітацыю, аж да аднаўлення на ранейшым працоўным месцы.
Яшчэ 25 абвінавачваных прызнаныя невінаватымі з-за недаказанасці ў частцы ўчыненых злачынстваў. У іх ліку Анатоль Грамовіч і былы намеснік начальніка мытні «Заходні Буг» Яўген Селіванаў.
У дачыненні да яшчэ чатырох абвінавачваных крымінальныя справы, паводле рашэння БВС, павінны былі быць накіраваныя ў Генеральную пракуратуру для новага папярэдняга расследавання.
Паводле інфармацыі партала tut.by, у 2012 годзе Грамовіч увайшоў у склад савета дырэктараў расейскага «СтарБанка», якому ў Беларусі належаў «ІнтэрПэйБанк » (раней «Крэдэксбанк»). У 2015 годзе акцыянеры прынялі рашэнне аб ліквідацыі «ІнтэрПэйБанка». Гэта адбылося пасля таго, як Нацбанк адклікаў у «ІнтэрПэйБанка» ўсе ліцэнзіі на ажыццяўленне банкаўскай дзейнасці.
Праблемы ў «Белгазпрамбанка», падкантрольнага групе расейскага «Газпрома», узніклі пасля таго, як Віктар Бабарыка, які ўзначальваў банк каля 20 гадоў, заявіў аб намеры балатавацца ў прэзідэнты Беларусі.
11 чэрвеня ў галаўным офісе «Белгазпрамбанка» і шэрагу іншых камерцыйных кампаній прайшлі вобшукі ў межах крымінальных спраў, якія Камітэт дзяржкантролю распачаў у сувязі з нібыта выяўленымі фактамі ўхілення ад выплаты падаткаў і легалізацыі сродкаў, атрыманых злачынным шляхам.
Аляксандр Лукашэнка заявіў, што праверка дзейнасці банка, якім да выбарчай кампаніі кіраваў Бабарыка, праводзіцца па яго даручэнні. Пры гэтым сцвярджаў, што ніякай палітычнай падаплёкі ў гэтым няма.
Бабарыка ж звязаў тое, што адбываецца, са сваёй палітычнай дзейнасцю. «Маштабнасць гэтай акцыі беспрэцэдэнтная. Яна праводзіцца ў межах перадвыбарнай кампаніі, і, з майго пункту гледжання, відавочна, што яна носіць палітычны характар», – заявіў ён.
18 чэрвеня Віктар Бабарыка, а таксама яго сын і кіраўнік ініцыятыўнай групы Эдуард Бабарыка былі затрыманыя па падазрэнні ў здзяйсненні эканамічных злачынстваў. Вядома, што ім выстаўленыя абвінавачанні, але адвакатам забаранілі паведамляць, па якіх менавіта артыкулах Крымінальнага кодэкса.
У той жа дзень старшыня Камітэта дзяржкантролю Іван Церцель паведаміў: Віктар Бабарыка «затрыманы ў сувязі з тым, што зʼяўляўся непасрэдным арганізатарам і кіраўніком супрацьпраўнай дзейнасці, паспрабаваў уздзейнічаць на сведак, схаваць сляды раней учыненых злачынстваў і літаральна на днях зняць буйную суму грошай з падкантрольных яму рахункаў». Паводле слоў старшыні КДК, у межах расследавання распачатыя справы па шасці артыкулах КК.
Паводле неафіцыйнай інфармацыі, па «справе «Белгазпрамбанка» затрыманыя больш за 20 чалавек.
Беларускія праваабаронцы і «Міжнародная амністыя» прызналі Бабарыку і яго затрыманых паплечнікаў палітычнымі зняволенымі.
Фота: tut.by