Беларускі гандаль спрабуе адмовіцца ад пластыкавых пакетаў
Бясплатныя фасовачныя пластыкавыя пакеты – зручная норма для пакупнікоў, але велізарны цяжар для прыроды, пластык раскладаецца ў зямлі да 1000 гадоў.
Паводле інфармацыі гандлёвай сеткі GREEN, адзін гіпермаркет рэалізуе ў дзень 47 тысяч пакетаў, уся сетка ў Беларусі – 285 тысяч штодня, штогод – 5 мільярдаў 200 мільёнаў пакетаў. Сетка пачынае пілотны праект супольна з Праграмай развіцця ААН, які будзе заахвочваць пакупнікоў да пераходу на папяровую ўпакоўку, да экалагічнай адказнасці. Пры гэтым, пэўная колькасць пластыку застанецца – ёсць прадукты, якія праблематычна пакаваць у паперу, кажа прадстаўнік GREEN Аляксей Гільдэнберг.
Дзяржава ўхваляе ініцыятыву, бо сітуацыя з адкідамі штогод пагаршаецца, зазначае дырэктар установы «Аператар другасных матэрыяльных рэсурсаў», каардынатар перапрацоўкі камунальных адкідаў у Беларусі Наталля Грынцэвіч:
– Кал і ў 1972 годзе мы закопвалі каля 4.5 метраў кубічных камунальных адкідаў, то ў 2002 гэта было ўжо 10 мільёнаў, і ў 2018 годзе – 22 мільёны кубічных метраў. У нас вельмі моцна памяняўся склад камунальных адкідаў, з’явілася вялікая колькасць упакоўкі. Што датычыцца збору і перапрацоўкі, то крыху больш трэці адкідаў пластмасы мы збіраем і перапрацоўваем. Дзве трэці мы пакуль яшчэ закопваем.
На думку Наталлі Грынцэвіч, такія ініцыятывы павінны ў рэшце рэшт паўплываць і на вытворцаў – гэта звяно аднаго ланцуга, стандарты ўпакоўкі ў харчовай прамысловасці таксама павінны змяняцца:
– Тут мы бачым па-сутнасці сімбіёз. Прыходзячы ў такую сетку, пакупнікі, сапраўды, змогуць выбраць упакоўку правільную, якая будзе экалагічнай. І такія сеткі змогуць фармаваць меркаванне вытворцаў і перабудоўваць бізнэс на тую ўпакоўку, якая будзе больш сяброўскай, якую можна будзе перапрацаваць у краіне.
Улады не плануюць рэзкай адмовы ад пластыкавай тары. Пераход на арганічныя віды ўпакоўкі будзе ажыццяўляцца ў некалькі этапаў. У бліжэйшы час плануецца прыняць спіс забароненай да выкарыстання пластыкавай упакоўкі.
Сяргей Залескі, Беларускае Радыё Рацыя