Сяргея Ціханоўскага раптоўна выпусьцілі
Калі ён зноў трапіць за краты — пакуль невядома.
1 студзеня каля 15.30 з гомельскага ізалятару часовага ўтрыманьня зьнянацку адпусьцілі блогера Сяргея Ціханоўскага. Учора яго прывезьлі на суд з ізалятара і пакаралі чарговымі 15 суткамі за нібыта ўдзел у акцыі супраць інтэграцыі з Расеяй.
Першы раз блогер быў асуджаны за нібыта ўдзел у акцыі супраць інтэграцыі ў Менску 20 сьнежня на 15 сутак арышту. Выйсьці на волю ён мусіў 11 студзеня. Але 10 студзеня яго прывезьлі з ІЧУ на суд, і пакаралі яшчэ 15 суткамі арышту — за нібыта ўдзел у акцыі супраць інтэграцыі з Расеяй 21 сьнежня. Сяргей Ціханоўскі сьцьвярджаў, што не ўдзельнічаў у акцыях — не насіў сьцягоў, не выкрыкваў лёзунгаў, а здымаў акцыю як блогер.
«Міліцыянты вывезьлі мяне з ІЧУ каля 15.30 і выкінулі на вуліцы. Тэлефона я ня меў, злавіў таксі. Невядома, калі мяне зноў пасадзяць, можа, нават сёньня. У ізалятары сказалі, што пакуль ня маюць судовага рашэньня на чарговыя 15 сутак для мяне», — распавёў у жывым эфіры пасьля выхаду з ІЧУ блогер.
Ён абяцае выйсьці ўвечары ў эфір і распавесьці падрабязнасьці пра сваё затрыманьне і ўмовы ў ізалятары. Падчас знаходжаньня там Ціханоўскага многія людзі дасылалі яму лісты падтрымкі і паштоўкі. «Мне іх не аддавалі. Толькі сёньня, пасьля выхаду з ІЧУ, мне далі заплечнік паштовак і лістоў. Я ўдзячны ўсім, і ўсім адкажу», — зазначыў Ціханоўскі.
Калі ён зноў трапіць за краты — пакуль невядома.
www.svaboda.org