Беларусь разглядае магчымасць нарошчвання экспарту праз эстонскі порт Сіламяэ
Порт Сіламяэ з'яўляецца самым блізкім портам Еўразвяза да Расеі. Гэта самы ўсходні глыбакаводны порт ЕЗ, здольны прымаць любыя самыя буйныя судны, якія заходзяць у Балтыйскае мора праз дацкія пралівы.
Беларусь разглядае магчымасць нарошчвання экспарту праз порт Сіламяэ (Эстонія). Пра гэта ішла гаворка падчас сустрэчы на гэтым тыдні пасла Беларусі ў Эстоніі Вячаслава Качанава са старшынёй савета дырэктараў АТ „Порт Сіламяэ” Тыйтам Вяхі і прадстаўнікамі кіраўніцтва эстонскага порта.
Як паведамляе пасольства Беларусі ў Эстоніі, бакі абмеркавалі перспектывы нарошчвання беларускага экспарту праз порт Сіламяэ, а таксама пытанні падключэння эстонскага бізнесу да рэалізацыі беларуска-кітайскіх праектаў, у тым ліку на базе размешчанага пад Менскам індустрыяльнага парку „Вялікі камень”.
Варта адзначыць, што ў апошнія месяцы на фоне ініцыятыў Літвы ў дачыненні да Беларускай АЭС на ўзроўні кіраўніцтва Беларусі стала абмяркоўвацца тэма магчымага перанакіравання беларускіх грузаў з Клайпедскага порта ў парты іншых дзяржаў.
Порт Сіламяэ з’яўляецца самым блізкім портам Еўразвяза да Расеі. Гэта самы ўсходні глыбакаводны порт ЕЗ, здольны прымаць любыя самыя буйныя судны, якія заходзяць у Балтыйскае мора праз дацкія пралівы.
„Размяшчэнне порта на тэрыторыі Эстоніі за 25 км ад мяжы ЕЗ і Расеі стварае ўсе неабходныя перадумовы для яго эфектыўнага выкарыстання ў якасці дыстрыбуцыйнага цэнтра для перавалкі грузаў і самых розных тавараў у напрамку Еўропы, ЗША, Расеі, Адзінай эканамічнай прасторы (АЭП), іншых краін СНД, Паўднёва-Усходняй Азіі і ва ўсе іншыя краіны свету”, — гаворыцца на сайце порта.
У 2014 годзе ў Сіламяэ адкрылі чатыры новыя прычалы агульнай даўжынёй 850 метраў для апрацоўкі кантэйнерных і генеральных грузаў. У перспектыве — пашырэнне порта шляхам будаўніцтва новых прычалаў, давядзенне чыгуначных пад’язных шляхоў да прычалаў, а таксама будаўніцтва новых складоў з нарошчваннем патэнцыялу і дыверсіфікацыі парку пагрузачнай тэхнікі.
belapan.by