«Кояшкай»да кунакта
Каникул башлану белән безнең мәктәптә җәйге лагерь эшли башлады. Без, 3нче сыйныф укучылары, лагерьга бик теләп язылдык. Чөнки алда безне күңелле очрашулар, төрле спорт уеннары, кызыклы ярышлар, экскурсияләр һәм конкурс-бәйгеләр көтә иде. Беренче көннән үк без отрядларга бүлендек, һәрбер отряд үзе теләгән исемне сайлады. Без үзебезгә «БЭМС» (Боевые, энергичные, молодые, симпатичные) дигән исем бик туры килә дип уйладык. Вожатыйлардан Алия апа без күңелле ял итсен өчен бик тырышты. Безне көн дә нинди дә булса яңалык көтеп тора иде. Без отрядлар белән ярыштык. Җиңдек тә, җиңелдек тә. Ә лагерь ахырында иң күп балны безнең БЭМС отряды җыйды. Урманга поход, страус фермасына экскурсия, башкалабыз Казанга поход, балавыз сыннар күргәзмәсе, Казан Дәүләт курчак театрына бару якты хатирәләр калдырды. Без шулай итеп айның үткәнен сизмәдек тә. Икенче елга да тагын шулай мәктәп лагерена киләбез дип, оештыручыларга, үзебезнең Дөбъяз мәктәбенә рәхмәт әйтеп таралыштык.