Иҗади балачак
Чаллының «Торнакай» балалар бакчасында кызыклы бәйгеләр, үзенчәлекле бәйрәмнәр үткәрергә яраталар. Шушы көннәрдә биредә «Сау бул, җәй, исәнме, көз!» рәсем бәйгесе оештырдылар. Балалар рәсем ясарга, әлбәттә, ярата, әмма бу юлы аларга әти-әниләр дә булышты. Бакчадагы һәр төркем бәйгедә бер зур рәсем-картина белән катнашты.
91нче санлы бакча балаларны эстетик юнәлештә тәрбияләүгә зур игътибар бирә. Биредә матурлык тудырырга омтылалар – ишек аллары яшеллеккә күмелгән. Шәһәркүләм «Төзекләндерү һәм яшелләндерү буенча иң яхшы территория» номинациясендә муниципаль учреждениеләр арасында беренче урынны яулаган коллектив бу. Балаларны да иҗади итеп тәрбияләргә тырышалар. Шәһәр, республика бәйгеләрендә җиңү яулаган балалар, аерым төркемнәр бар. Лиана Гыйльфанова «Әнигә бүләккә» кәгазь аппликацияләр бәйгесендә беренче урынны алган, малайлар хоры «XXI гасыр йолдызчыклары» бәйгесендә икенче урынга лаек булган, Әмир Хуҗин «Халык биюе» номинациясендә өченче урынга чыккан. Замирә Хәбибуллина театр миниатюралары бәйгесендә, «Сәхнәләштерелгән шигырь» номинациясендә II дәрәҗә диплом алган. «Акыл булган җирдә мәгънә бар» («Где ум, там и толк») интеллектуаль бәйгесендә бакча III дәрәҗә диплом белән бүләкләнгән. Афәрин!