Балалар иминлеген кайгыртыйк
Районда “Игътибар – балалар!” акциясе бара.
Ул 20 сентябрьгә кадәр дәвам итәчәк. Практика күрсәткәнчә, мәктәпләрдә укулар башлангач балаларның автомобиль юлларында хәвефкә юлыгу очраклары бермә-бер арта. Шуңа аларга юл хәрәкәте кагыйдәләрен җентекләп төшендерү зарур. Хәзер мәктәпләрдә һәм балалар бакчаларында әлеге темага дәресләр, сыйныф сәгатьләре, ЮХИДИ инспекторлары белән очрашулар үткәрелә.
–20 августтан, акция башланганнан бирле, өч җәяүле һәм өч велосипедчы балага юл хәрәкәте кагыйдәләрен бозган өчен кисәтү ясалды. Велосипедчыларның да юл хәрәкәте кагыйдәләрен төгәл үтәргә тиешлеген, ә скутерларда бары 16 яше тулганнарга һәм махсус таныклыгы булганнарга гына йөрергә рөхсәт ителүен онытмаска иде,–ди ЮХИДИның район бүлекчәсе начальнигы Рәис Сафин.
Акция барышында велосипедчы һәм скутерчылар гына түгел, автомобиль юлында тәртип бозучы, тиешле кагыйдәләрне үтәмәүче балалар да күзәтү астына алыначак. Транспорт йөртүчеләр кечкенә җәяүлеләргә, пассажир балаларга карата аеруча игътибарлы булсыннар иде. Тизлек режимын саклау, иминлек каешын файдалану, автомобильләрдә балаларны махсус утыргычларда йөртү иң элек үзебез һәм якын кешеләребез иминлеге өчен кирәк бит.