Лениногорскида шәһәр мэры 4нче мәктәптә тавыш бирде
Шәһәребезнең 4нче мәктәбендә урнашкан 475 санлы алдан тавыш бирү участогына иртәдән бирле кеше агыла да агыла. Иң беренчеләрдән булып биредә сәгать 8.00 дә шәһәр мэры Рәгать Хөсәенов үз тавышын биреп киткән.
Тавыш бирүчеләрнең яше уртача алганда егерме биштән алып алтмышкача.
Беренче тапкыр тавыш бирүчеләр, ягъни унсигезе тулганнар күзәтелмәгән, ә менә иң олы тавыш бирүчене хәтердә калдырганнар. Ул - туксан яшьлек Ольга Липатова.
Көндезге сәгать бергә булган мәгълүматларга караганда, тавыш бирергә 1мең 235 кеше килгән. Аеруча да төшкә кадәр актив булганнар.