Тавыктан катлама
Тавык итеннән ниләр генә әзерләмиләр хәзер. Шулпасын да кайнаталар, шашлыгын да кыздыралар. Ә мин сезгә тавыкның түш итеннән бик тәмле катлама пешереп карарга тәкъдим итәм. Бу ризыкны әзерләве бер дә авыр түгел. Аны көндәлеккә пешерсәң дә була, кунак табынына куйсаң да, бик күркәм булыр.
Кирәк:
* 1 кг түш ите;
* 200 г гөмбә (шампиньон яисә бүтән төр гөмбә);
* уртача зурлыктагы бер баш суган;
* 150 г чамасы каты сыр;
* 2 аш кашыгы томат пастасы;
* тоз, борыч, кыздыру өчен үсемлек мае.
Эш барышы:
Итне сөякләреннән аралыйбыз һәм пакетка тыгып, тапыйбыз. Артыгын тырышып, итне тишкәләмәгез тагын. Итнең ике ягына да тоз һәм борыч сибәбез. Суган белән гөмбәне вак шакмаклап турап, үсемлек маенда кыздырабыз. Итнең бер читенә гөмбә белән суганны салабыз, өскә уылган сыр сибәбез һәм итне тыгызлап төрәбез. Ачылып китмәсен өчен теш чистарткыч таякчыклар белән чәнчеп куярга була. Төргәкләребезне табага тезәбез. Томат пастасын 300 мл суда яки шулпада сыеклап, ит өстенә коябыз. Капкач яки фольга белән каплап, 220 градуслы кайнар мичтә ярты сәгать пешерәбез. Табынга биргәндә, ит янына пешкән бәрәңге, дөге куярга мөмкин.