Ермек Сағымбаев ҰҚК басшысы лауазымынан неге босатылғаны белгілі болды
Президенттің кеңесшісі – баспасөз хатшысы Айбек Смадияров Ермек Сағымбаев Қазақстан Ұлттық қауіпсіздік комитетінің төрағасы қызметінен неге босатылғанын айтты, деп хабарлайды Tengrinews.kz тілшісі.
Смадияровтың айтуынша, Мемлекет басшысы Сағымбаевты басқа жұмысқа ауысуына байланысты қызметінен босатқан. Президент аталған арнайы қызметті реформалау міндетін табысты орындау мақсатында басшылық кадрлардың орнын ауыстыру қажеттігін ескере отырып, осындай шешімге келген.
"Мемлекет басшысы Қасым-Жомарт Тоқаев Ермек Сағымбаевты қызметтен босату туралы шешім қабылдағанда жемқорлық оқиғасына қатысы бар лауазымды тұлғаларды ұстау жағдайын да ескерді. Президенттің пікірінше, күштік құрылым қызметкерлері қателіктер жіберген. Осыған байланысты Ішкі істер министрі Ержан Сәденовке қызметтік ескерту жарияланды", - деді Айбек Смадияров Tengrinews.kz тілшісіне.
Сол күні Мемлекет басшысы Ішкі істер министрлігінің басшылық құрамымен жұмыс кеңесін өткізгені де атап өтілді. Президент "Заң мен Тәртіп" қағидатына сай қоғамдық қауіпсіздікті қамтамасыз етуге қатысты міндеттерді атқару барысында полицияның кәсіби даярлық деңгейін көтеруді тапсырды.
Министр Ержан Сәденовке полицияның қатардағы қызметкерлері мен офицерлік құрамы арасында тәрбие жұмыстарын күшейту керек екені айтылды.
Еске сала кетейік, бүгін, 16 қарашада, Мемлекет басшысының Жарлығымен Ермек Сағымбаев Ұлттық қауіпсіздік комитетінің төрағасы қызметінен босатылды.
Комитеттің жаңа төрағасы болып Марат Ирменов тағайындалды.
