30 мың тұрақ уәде етілді: Алматыда екі жылда қанша орын пайда болды?
2024 жылдың наурызында Алматының экс-әкімі Ерболат Досаев тұрақ орындарының саны 30 мыңға дейін артатынын мәлімдеген болатын. Содан бері екі жарым жыл өтті. Tengri Auto сол уақыттан бері автотұрақтар саны қалай өзгергенін және қала бұған дейін айтылған көрсеткіштерге қаншалықты жақындағанын анықтап көрді.
Алматыда қанша автотұрақ бар?
"Алматы паркинг" мәліметінше, 2024 жылдың наурызында тұрақ орындарының саны 12 мыңнан асқан.
Қазіргі уақытта қалада 17 825 коммуналдық ақылы тұрақ орны жұмыс істейді. Демек, олардың саны шамамен 5,8 мыңға артқан.
Бұл санға тегін тұрақ орындары кірмейді, өйткені олар компанияның құзырында емес.
Сонымен қатар тұрақ желісін кеңейту жұмыстары жалғасып жатыр. Тұрақ кеңістігін дамыту тек орындар санын көбейтуді ғана емес, сонымен қатар көлік жүктемесі мен тұрғындардың қажеттіліктерін ескере отырып, қолданыстағы инфрақұрылымды тиімдірек пайдалануды көздейтінін атап өткен жөн.
2026 жылдың соңына дейін қанша автотұрақ пайда болады?
Осы жылдың соңына дейін қалада 8 мыңнан аса коммуналдық ақылы тұрақ орнын ұйымдастыру жоспарланған. Осылайша, қаладағы мұндай орындардың жалпы саны шамамен 25 мыңға дейін артуы тиіс. Алайда жыл соңына дейін небәрі екі ай қалды.
"Жұмыстар магистральдық көшелер мен тұрақ кеңістігін ретке келтіруге деген сұраныс жоғары басқа да учаскелерде тұрақ желісін кезең-кезеңімен кеңейтуді қарастырады", - деп хабарлады компания.
Таңдау кезінде көлік ағынының қарқындылығына, тұрақтардың қажеттілігіне, жол-көлік желісінің ерекшеліктеріне және тұрғындар мүддесіне басымдық беріледі.
Тұрақтардың түрі қандай болады?
"Алматы паркинг" берген жауапқа сәйкес, қалада тұрақтың екі түрін: көше бойындағы және жеке алаңдардағы тұрақтарды дамыту жоспарланған.
Бірінші нұсқа автомобильдердің тұруын ретке келтіруге және бейберекет тұрақ жағдайларын азайтуға мүмкіндік береді. Екіншісі автомобильдер үшін арнайы алаңдар құруды көздейді.
Қай түрі таңдалатыны учаскенің ерекшеліктеріне, бос орынға және көлік жүктемесіне байланысты болады. Бұл ретте көпқабатты үйлердің аулаларын коммуналдық ақылы тұрақтар желісіне қосу жоспарланбаған.
Сондай-ақ бізді қалада көпдеңгейлі тұрақтардың пайда болатыны не болмайтыны қызықтырды.
Компания бұл мәселе жекелеген аудандардың қажеттіліктерін, қолайлы жер учаскелерінің болуын және тұрғындардың пікірін ескере отырып қарастырылатынын мәлімдеді.
Еске сала кетейік, 4 қазаннан бастап Алматыда ақылы тұрақ бағалары өзгерді.