Президент ел дамуына елеулі үлес қосқан қазақстандықтарды марапаттады
Жоғары мемлекеттік наградаларға ие болғандар қатарында жұмысшы мамандық иелері, мәдениет қайраткерлері, педагогтер, ғалымдар мен медицина қызметкерлері бар.
Жоғары наградаларды кімдер алды?"Қазақстанның Еңбек Ері" атағы металлург Әбдірәшит Доспановқа берілді, ол әке ізін басып, осы салада 40 жылдан аса уақыт жұмыс істеп келе жатыр.
"Кәсіби шеберлігі мен еңбекке адалдығының арқасында зор табысқа жетіп, елімізді өркендетуге мол үлес қосып жүр. Бүгінде жас мамандарға бағыт-бағдар беріп, оларға өмірлік кәсібінің қыр-сырын үйретуде", - деп атап өтті Президент.
Композитор әрі педагог Алтынбек Қоразбаевқа "Отан" ордені табысталды.
"Оның әндері бірнеше буынның жүрегіне жол тауып, қазақ өнерінің алтын қорына қосылды", - деді Тоқаев.
Даңқты альпинист Қазбек Валиев ІІ дәрежелі "Барыс" орденімен марапатталды. Президент оның планетаның ең биік шыңдарын бағындырудағы жетістіктерін атап өтті.
Педагогтер мен мәдениет қайраткерлеріне берілген наградалар
Ерекше білім беру қажеттіліктері бар балаларды оқытудың заманауи тәсілдерін енгізіп жүрген жаңашыл мұғалім Наталья Сафиулинаға "Қазақстанның еңбек сіңірген ұстазы" атағы берілді.
"Мемлекет шын мәнінде инклюзивті қоғам қалыптастыруға үлес қосып жүрген осындай педагогтерді әрдайым қолдайды", - деді Мемлекет басшысы.
Белгілі опера әншісі Талғат Мұсабаевқа "Қазақстанның халық әртісі" атағы берілді.
Музей ісін дамытумен және тарихи-мәдени мұраны сақтаумен айналысатын өлкетанушы Бауыржан Жәнібековке "Қазақстанның еңбек сіңірген қайраткері" атағы берілді.
Педагог әрі өнертанушы Эльмира Сұлтанғалиеваға "Құрмет" ордені табысталды.
Абаттандыру және ауыл шаруашылығы қызметкерлеріне берілген наградаларПрезидент жұмысшы мамандықтары иелерін атап өтті.
"Астана-Көгалдандыру құрылысы" мекемесінің қызметкері Дидар Телжанұлы елорданы абаттандыруға қосқан үлесі үшін "Құрмет" орденімен марапатталды.
Оның жұмысы туралы айта келе, Тоқаев "Таза Қазақстан" жалпыұлттық қозғалысының маңыздылығына тоқталды.
"Көшелеріміз таза болмаса, әрбір жерде ағаш пен гүлдер көп егілмесе, азаматтарымыз табиғатқа қамқор болмаса, еліміз де жасампаз болмайды. Бұл – анық нәрсе".
"Астана-Орманы" мекемесінің қызметкері Аманжол Үйсенбаев "Ерен еңбегі үшін". медалімен марапатталды.
Солтүстік Қазақстан облысы Шал ақын ауданынан келген, ауыл шаруашылығында 30 жылға жуық еңбек етіп жүрген механизатор Сергей Пустыльников ІІІ дәрежелі "Еңбек Даңқы" орденімен марапатталды.
Медицина қызметкерлері мен педагогтер
Мейірбике Анар Әбдіқұловаға және ұлағатты ұстаз Сәлима Жұмамұратоваға "Шапағат" медалі табысталады.
Президент мұғалімдер мен медицина қызметкерлерін жан-жақты қолдау қажеттігін атап өтті.
Сондай-ақ бір топ азамат қоғамдық бірлік пен келісімді нығайтуға қосқан үлесі үшін "Ел бірлігі" орденімен марапатталды.Қанша қазақстандық награда алды?
Президенттің айтуынша, мемлекеттік наградаларға түрлі сала өкілдері ие болды. Олардың қатарында:
129 еңбек ардагері;өнеркәсіп, көлік, құрылыс, ауыл шаруашылығы және басқа да салалардың 473 қызметкері;шағын және орта бизнес өкілдерінен 200-ден аса адам;150-ден астам педагог пен ғалым;120-ға жуық медицина қызметкері бар.
"Еліміздің абыройын асырып жүрген еңбек адамдарына құрмет көрсету – мемлекеттік саясатымыздың өзегіі", - деді Қасым-Жомарт Тоқаев.
Сөз соңында Президент марапат иелерін және барша қазақстандықтарды Республика күнімен құттықтады.
"Мемлекеттігіміздің мызғымас тұғыры мәңгі болсын! Қастерлі Отанымыз – Қазақстан өсіп-өркендей берсін!"