Айыппұл бөтен көлік үшін келді: қалай дауласуға және ақшаны қайтаруға болады?
Ішкі істер министрлігі камераға басқа көлік түсіп қалғанда немесе айыппұл автокөлік ресми қайта тіркелгеннен кейін жасалған заңбұзушылық үшін келген жағдайда не істеу керектігін айтты. Ведомство шағымды қайда түсіру керектігін және төленіп қойған ақшаны қалай қайтаруға болатынын түсіндірді, деп хабарлайды Tengri Auto.
Шағымға қандай құжаттарды қоса беру керек?
Егер автокөлік иесі айыппұлмен келіспесе, ол мән-жайларды тексеру үшін өз уәждері мен құжаттарын ұсына алады. ІІМ нұсқаманың немесе қаулының көшірмесін, жеке куәлікті, көлікті тіркеу туралы куәлікті, сатып алу-сату шартын, меншік иесінің ауысуын тіркеу күні туралы мәліметтерді, сондай-ақ фотосуреттер мен басқа да дәлелдемелерді қоса беруді ұсынады.
Мысалы, егер заңбұзушылық көлік сатылғаннан кейін тіркелсе, меншік иесінің ауысуы ресми түрде қашан тіркелгенін растау маңызды. Егер суретте басқа көлік құралы болса, оны көрсететін материалдарды қоса беруге болады.
Шағым түсіруге қанша уақыт беріледі?
Мерзім жүргізушінің қандай құжат алғанына байланысты болады.
Автоматты камера деректері бойынша шығарылған айыппұлды төлеу қажеттігі туралы нұсқамаға ӘҚБтК-нің 817-бабында көрсетілген мерзім өткеннен кейін он тәулік ішінде шағым түсіруге болады. Осы бап бойынша іс нұсқама тиісті түрде табыс етілген сәттен бастап 15 тәулік өткен соң қаралды деп есептеледі.
Анықтама: ӘҚБтК-нің 817-бабы - әкімшілік құқық бұзушылық туралы істі қарау мерзімдері туралы. Камерамен тіркелген заңбұзушылық үшін іс нұсқама тиісті түрде табыс етілгеннен кейін 15 тәулік өткен соң қаралды деп есептеледі. Бұл шағымдану мерзімі емес.
Осылайша, қалыпты жағдайда нұсқамаға шағымдану үшін ол тиісті түрде табыс етілген сәттен бастап 25 тәулік беріледі.
Қаулыға шағымды оның көшірмесі табыс етілген немесе қаулы алынған күннен бастап - егер адам істі қарауға қатыспаған болса - он тәулік ішінде беруге болады.
Құжатты шығарған органға немесе тікелей уәкілетті сотқа жүгінуге болады. Егер шағын белгіленген мерзімде берілсе, айыппұлдың орындалуы ол бойынша шешім қабылданғанға дейін тоқтатыла тұрады.
Төленген айыппұлды қалай қайтаруға болады?
Егер нұсқаманың күші жойылса және іс бойынша іс жүргізу тоқтатылса, уәкілетті орган есептік мәліметтерді түзетуі тиіс. Егер жүргізуші айыппұлды төлеп қойған болса, ол осы органға ақшаны қайтару туралы өтініш беріп, нұсқаманың немесе қаулының күші жойылғанын және төлем жасалғанын растайтын құжатты қоса беруі керек.
ІІМ өз жауабында ақшаны қайтарудың нақты мерзімін атамады: ол бюджет заңнамасының қолданыстағы нормалары мен қаржылық операциялардың тәртібіне байланысты болады.
Ішкі істер министрлігі айыппұлды 50 пайыздық жеңілдікпен төлеу мүмкіндігін де еске салды. Автоматты түрде тіркелген жағдайда бұл мерзім нұсқама тиісті түрде табыс етілген сәттен бастап жеті тәулікті құрайды, жеңілдік заңда қарастырылған шарттар сақталған жағдайда қолданылады.
Мән-жайы
Қыркүйек айында біз Алматы – Қорғас тасжолымен жүргеннен кейін жаппай айыппұл салынғаны туралы хабарлаған болатынбыз. ІІМ техникалық ақау болғанын растады: кейбір нұсқамаларда автокөліктің орташа жылдамдығының орнына бақылау аркаларының біріндегі лездік жылдамдығы көрсетілген. Ведомство жүргізушілердің өтініштерін қарастырып жатқанын және айыппұл қате ресімделген жағдайда ақшаны қайтаратынын мәлімдеді.