Әр бәстен түскен ақша қайда жұмсалады: Қазақстанда букмекерлер үшін ережелер өзгереді
Қазақстанда букмекерлік кеңселер мен тотализаторлар аударымдарын бөлу тәртібі өзгерді. Тиісті қаулыға премьер-министр Олжас Бектенов қол қойды, деп хабарлайды Tengrinews.kz.
Құжатқа сәйкес, ойын бизнесін ұйымдастырушылардың аударымдары спортты дамытумен айналысатын ұйымдар, қайырымдылық қоры және есепке алу жүйесінің операторы арасында бөлінетін болады.
Қаражат қалай бөлінеді?
Үкімет мынадай пропорцияларды белгіледі:
кемінде 75 пайыз - дене шынықтыру мен спортты дамытуға бюджеттен тыс қаражатты бөлетін бірыңғай операторға;
7 пайыз - Ұлттық олимпиадалық комитеттің қорына олимпиадалық спорт түрлерін дамытуға;
5 пайыздан - "Қазақстан халқына" қоғамдық қорына;
13 пайызға - бәс тігулерді есепке алудың бірыңғай жүйесінің жұмысын қамтамасыз ететін ұйымға.
Осылайша, аударымдардың 82 пайызы дене шынықтыру мен спортты дамытуға, тағы 5 пайызы - "Қазақстан халқына" қорына бағытталады. Қалған 13 пайызы бірыңғай есепке алу жүйесінің жұмысына қарастырылған.
Бұл жерде букмекерлік кеңселер мен бәс тігу операторларының жалпы табысы емес, әрбір жасалған бәс тігу сомасының 3,3 пайызын құрайтын міндетті жарналар туралы сөз болып отыр.
Жаңа ережелер 2026 жылғы 24 қазаннан бастап күшіне енеді.
Қаулының бұрынғы редакциясында бөлу тәртібі басқаша болатын. Спортты дамытуға арналған бірыңғай операторға аударымдардың 45 пайызы, Ұлттық олимпиадалық комитет қорына - 21 пайызы, "Қазақстан халқына" қорына - 21 пайызы бағытталатын. Бірыңғай есепке алу жүйесінің жұмыс істеуіне, қазіргідей, 13 пайыз қарастырылған еді.
Еске сала кетейік: 2024 жылдың қыркүйегінен бастап Қазақстанда букмекерлік кеңселер мен тотализаторлардың жарнамасына шектеулер қойылған. Атап айтқанда, мұндай жарнаманы көліктерде, сыртқы жарнама конструкцияларының көбінде, масс-медиада және онлайн-платформаларда орналастыруға тыйым салынған. Ерекшеліктер, соның ішінде, мамандандырылған спорттық БАҚ-тар мен халықаралық спорттық жарыстардың трансляциялары үшін қарастырылған.