Қазақстан Қытайдан қарыз алды: министр мемлекеттік қарыз туралы айтты
Қазақстанның мемлекеттік қарызы 38,5 триллион теңгені немесе ЖІӨ-нің 20,9 пайызын құрайды. Оның ішінде сыртқы қарыз - 8,4 триллион теңге немесе ЖІӨ-нің 4,5 пайызы. Бұл туралы бүгін Құрылтай отырысында қаржы министрі Мәди Такиев мәлімдеді, деп хабарлайды Tengrinews.kz тілшісі.
2027–2029 жылдарға арналған бюджет жобасын талқылау барысында депутаттар мемлекеттік қарыздың өсуі мен оған қызмет көрсету шығындары туралы сұрады. Такиев үкімет қарызды басқарып отырғанын, соның ішінде қаражатты неғұрлым тиімді шарттармен қайта қарызға алу арқылы реттейтінін айтты.
Оның айтуынша, бұл мақсатта Мемлекеттік қарызды басқару жөніндегі кеңес құрылып, алғашқы дилерлер институты іске қосылған және Қазақстанның мемлекеттік бағалы қағаздары халықаралық индекстерге қосылған.
Министрдің сөзінше, мемлекеттік қарыздың белгіленген лимиті ЖІӨ-нің 32 пайызын құрайды. Такиев Қазақстан заңнамалық шектеулер мен талаптарды сақтап отырғанын, ал сарапшылар, соның ішінде халықаралық мамандар қарыз деңгейін төмен деп бағалайтынын жеткізді.
"Биыл біз Қытайдан минималды 1,82 пайыз мөлшерлемемен бір жарым миллиард доллар тарттық. Бұл қарызға қызмет көрсетуге жылына 12,7 миллиард теңге жұмсалады. Егер біз дәл осы бір жарым миллиард долларды ішкі нарықтан тартқанда, оған қызмет көрсету 113 миллиард теңгеден асып кетер еді", - деді Такиев.
Оның айтуынша, айырмашылық жылына шамамен 100 миллиард теңгені құрайды, ал бес жыл ішінде үнемделген қаражат 500 миллиард теңгеге жетеді. Сондай-ақ министр Қазақстан еурооблигациялар арқылы 2015 жылы 5,5 пайызбен, ал өткен жылы 4,4 пайызбен қарыз алғанын атап өтті. Оның бағалауынша, бұл жылына 60 миллион долларды үнемдеуге мүмкіндік береді.
2027 жылға арналған бюджет жобасында мемлекеттік қарызға қызмет көрсетуге 3,5 триллион теңге қаралған. Қаржы министрлігі бюджет тапшылығын 4,5 триллион теңге деңгейінде болжады. Толығырақ - 2027 жылғы Қазақстанның кірістері мен шығыстары туралы материалда.
Маусым айында Мәди Такиев 2026 жылғы 1 қаңтардағы жағдай бойынша Қазақстанның мемлекеттік қарызы 36,4 триллион теңгені немесе ЖІӨ-нің 22,8 пайызын құрағанын хабарлаған болатын. Сондай-ақ министр мемлекет ескі міндеттемелерді қайта қаржыландыру үшін жаңа қарыздарды пайдаланатынын түсіндірді.