Атырауда адамдар мінген лифт құлады: зардап шеккендер бар

Атыраудағы тұрғын үй кешенінде ішінде төрт адамы бар лифт құлады. Оқиғаның мән-жайы – Tengrinews.kz материалында.
Не болды?
Атырау облысы Төтенше жағдайлар департаментіне 5 қазанда сағат 10:05-те лифт шахтасына адамдардың құлағаны туралы хабарлама түскен.
"Атырау қаласының Құлманов көшесінде орналасқан көпқабатты тұрғын үйде лифт шахтасына адамдардың құлағаны туралы ақпарат түсті", – деп хабарлады ТЖД өкілдері.
Қала әкімінің баспасөз қызметі оқиғаның "Гранд Атырау" ТҮК-інің Б блогында болғанын нақтылады. Лифт ішінде төрт адам болған.
"Үшінші қабаттан лифттің апаттық жағдайда төмен түсуі болған", – деп хабарлады әкімдік.
Лифттің не себепті құлағаны әзірге белгісіз. Оқиғаның себептерін жауапты қызметтер анықтап жатыр.
Зардап шеккендер бар ма?
Атырау әкімі баспасөз қызметінің мәліметінше, оқиғадан кейін жедел жәрдем үш тұрғынды тексеру үшін ауруханаға жеткізген. Тағы бір адам медициналық көмектен бас тартты.
"Алдын ала ақпарат бойынша, олардың жағдайы қанағаттанарлық деп бағаланған", – деп хабарлады әкімдік.
ТЖД мәліметінше, оқиға салдарынан төрт жолаушы зардап шеккен. Үшеуіне дәрігерлер қажетті көмек көрсетіп, үйлеріне жіберген. Зардап шеккендердің бірі медициналық көмектен бас тартты, деп хабарлады ведомство.
Бүкіл Атырау бойынша лифтілер тексеріледі
Оқиға орнына Атырау әкімі Данияр Таханов барды. Қала басшысы апаттың себебін анықтауды тапсырды. Оқиғадан кейін билік бүкіл қала бойынша лифтілердің техникалық жағдайын тексереді.

"Қала әкімі жауапты қызметтерге қысқа мерзімде жеделсатының апаттық төмендеу себептерін анықтауды, сондай-ақ қаладағы барлық лифтінің техникалық жай-күйіне кешенді тексеру жүргізіп, олардың қауіпсіздік деңгейін бағалауды тапсырды. Жағдай қала әкімінің жеке бақылауында", – деп хабарлады баспасөз қызметі.

Еске салайық, былтыр 13 қарашада Астанада тұрғын үй кешеніндегі лифт құлап, бір адам мерт болды.