Әбиба Әбужақынова Қазақстан құрамасына Азия ойындарының алғашқы медалін сыйлады
48 келіге дейінгі салмақ дәрежесі финалында қазақстандық спортшы жарыс қожайыны Мицуки Кондомен белдесті. Белдесудің басым бөлігінде қарсыластар сәтті әдіс жасай алмады, алайда соңғы минутта жапон қызы Әбибаны қапы қалдырып, "иппон" әдісін орындады.
Нәтиже – Мицуки Кондоның жеңісі.
Айта кетейік, Әбибаның медалі Қазақстан құрамасы үшін Азия ойындарындағы 15-ші күміс, ал дзюдодан алғашқы жүлде болды. Қазір біздің команда қоржынында 9 алтын, 15 күміс және 30 қола марапат бар.
Әбиба Әбужақынова – Қазақстанның танымал дзюдошысы
Әбиба - соңғы жылдардағы әлемнің ең мықты дзюдошыларының бірі және Қазақстандағы ең көп марапатқа ие спортшы. 2022 жылы ол дзюдодан әлем чемпионатының медалін жеңіп алған еліміздің алғашқы өкілі атанды.
Ол өз мансабында әлем чемпионатының үш медалін иеленген: 2022 және 2024 жылдары қола, ал 2025 жылы күміс жүлдегер атанды. Бұдан бөлек, оның еншісінде өткен Азиаданың күміс жүлдесі бар. Ол кезде финалда Жапонияның тағы бір өкіліне есе жіберген болатын.
Спортшының айтуынша, ол 2028 жылы Лос-Анджелесте өтетін Олимпиада ойындарына қатысуды жоспарлап отыр.
Әбужақынованың күміс жүлдесі – 2026 жылғы Азиададағы қазақстандық дзюдошылардың алғашқы марапаты.
Instagram-дағы бұл жарияланымды көру
JENYS JUDO CLUB | KAZAKHSTAN (@jenysjudoclub) жарияланымы
Бұған дейін Азия ойындарының финалына олимпиада чемпионы, қазақстандық дзюдошы Елдос Сметов шықты.