Қазақстанда қар жауып, -6 градусқа дейін аяз болады

"Қазгидромет" мамандары 1, 2 және 3 қазанға арналған ауа райы болжамын ұсынды, деп хабарлайды Tengrinews.kz тілшісі.

Болжамға сәйкес, Қазақстанда қазан басында ауа райы айтарлықтай өзгереді. 1–3 қазан аралығында елдің басым бөлігінде жаңбыр жауып, батыс пен солтүстік-батыста жаңбырдың соңы жылбысқы қарға ұласуы мүмкін. Кей аймақтарда түнде температура -6 градусқа дейін төмендейді.

Жаңбыр жылбысқы қарға ұласады

Синоптиктердің болжамы бойынша, 1–3 қазан аралығында атмосфералық фронттардың өтуіне байланысты Қазақстан аумағының басым бөлігінде ауа райы құбылмалы болады. Жаңбыр жауып, жел күшейеді деп күтіледі, ал елдің батысы мен солтүстік-батысында жауын-шашын жаңбыр мен жылбысқы қар түрінде болады.

Күн қай жерде қатты суытады?

Елдің батысында ауа температурасы түнде -1…-6 градусқа дейін төмендеп, күндіз небәрі +3…+8 градус жылы болады.

Солтүстік-батыста күндізгі уақытта температура +15…+25 градустан +5…+15 градусқа дейін төмендейді.

Сонымен қатар елдің солтүстігінде, шығысында және орталығында негізгі температуралық фон +13…+23 градус жылы болады.

Оңтүстік пен оңтүстік-шығыста күн жылырақ болады, атап айтқанда +20…+25 градус, ал таулы аймақтарда температура +10…+15 градусты көрсетеді.

Қазақстанда қазан айы қандай болады?

Бұған дейін синоптиктер Қазақстандағы қазан айына арналған ауа райы болжамын айтқан болатын. Айдың басында кей өңірлерде әлі де салыстырмалы түрде жылы ауа райы сақталады, алайда кейін температуралық фон өзгере бастайды. Бұл ретте ауа райы аймақтар бойынша айтарлықтай ерекшеленеді: кей облыстарда жылы болса, басқаларында күн суытып, жаңбыр мен жылбысқы қар жаууы мүмкін.