Қамауға алынған Ерғали Аманбаевтың депутаттық мәртебесі сақталған

Түркістан облысы Бәйдібек аудандық мәслихатының депутаты Ерғали Аманбаев шетелдік азаматқа қатысты "жыныстық сипаттағы зорлық-зомбылық жасады" деген айыппен сотқа дейінгі тергеп-тексеру басталғанына қарамастан, халық қалаулысы мәртебесін сақтап қалды. Бұл туралы облыстық аумақтық сайлау комиссиясы хабарлады, деп жазады Tengrinews.kz тілшісі.
Тергеу изоляторындағы Ерғали Аманбаев әлі де депутат
Түркістан облыстық аумақтық сайлау комиссиясы (АСК) қазіргі уақытта Ерғали Аманбаевтың депутаттық мандаты сақталғанын мәлімдеді. Себебі қарапайым: сотқа дейінгі тергеу фактісінің өзі оны өкілеттігінен айыруға негіз бола алмайды.

"Қазақстан Республикасының заңнамасына сәйкес, сотқа дейінгі тергеп-тексеру кезінде депутаттық мандат сақталады. Бұл Қылмыстық-процестік кодекстің 19-бабына негізделген: әрбір адам оның қылмыстық құқық бұзушылық жасаудағы кінәлілігі осы Кодексте көзделген тәртіппен дәлелденгенге және соттың заңды күшіне енген үкімімен белгіленгенге дейін кінәсіз деп есептеледі", – делінген Tengrinews.kz редакциясының ресми сауалына берілген жауапта.

Бұл ретте Аманбаевтың өкілеттігін тоқтату мәселесі қазір қаралып жатқан жоқ.
Мәслихатқа бұл мәселе бойынша ешқандай өтініш түспеген, оның депутаттық мәртебесіне қатысты отырыстар немесе комиссиялар өткізілмеген. Мәселенің этикалық жағы да қаралмаған.
Сонымен қатар бұған дейін мәслихат АСК-ға Аманбаевтың мәртебесіне қатысты ақпарат алу үшін жүгінгені атап өтілді. Комиссия оның алдағы мәртебесі құқық қорғау органдарының немесе соттың шешімінен кейін анықталатынын хабарлады.
Аманбаевтың мандаты әзірге сақталғанымен, ол іс жүзінде депутаттық өкілеттігін орындай алмайды. Күзетпен ұстау кезеңінде оған сессиялар мен мәслихаттың басқа да отырыстарына қатысуға тыйым салынған.
Осылайша, Аманбаев депутат мәртебесін сақтап отыр, бірақ өз міндеттерін атқармайды.
Депутат неге қамауға алынды?
Бұған дейін желіде әйелге қатысты жыныстық сипаттағы зорлық-зомбылық жасалуы мүмкін екендігі туралы ақпарат тараған болатын. Түркістан облысы полиция департаменті сотқа дейінгі тергеу амалдары басталғанын хабарлады.

"Күдікті, Шымкент қаласының тұрғыны анықталып, қамауға алынды. Қазіргі уақытта барлық мән-жайды анықтауға бағытталған қажетті шаралар жүргізіліп жатыр", – деп мәлімдеді полиция.

Бұқаралық ақпарат құралдарында жарияланған бейресми деректерге сүйенсек, полицияға 34 жастағы әйел арызданған. Ол қорғасын-мырыш кенін өндіруге инвестиция салу мүмкіндігіне қызығушылық танытқан төрт шетелдікпен бірге Байжансай ауылына келген көрінеді.
БАҚ мәліметінше, қонақтарды депутат Ерғали Аманбаев қарсы алып, бастап жүрген. Кейінірек ол әйелді адам аяғы баспайтын жерге апарып, зорлаған делінген. Ресми түрде баяндалған бұл жайттар әзірге расталған жоқ.
777 нөмірлі жол талғамайтын көлік және жалған нөмірлер
БАҚ Ерғали Аманбаев туралы 2025 жылы - депутат бірқатар жол қозғалысы ережесін өрескел бұзғаннан кейін жазды.
Өткен жылы тамызда желіде бейнежазба пайда болды, онда 777 нөмірлі жол талғамайтын көлік Шымкентте ережелерді бірнеше рет бұзған. Жүргізуші қарсы бағытқа шығып кеткен, сақтандырусыз және қауіпсіздік белдігін тақпай көлік айдаған, тыйым салынған жерлерде артқа қарай жүрген және қозғалысты бастар алдында сигнал бермеген.
Кейінірек рөлде Бәйдібек аудандық мәслихатының депутаты Ерғали Аманбаевтың болғаны анықталды. Сондай-ақ сот оның Lexus көлігін жалған мемлекеттік нөмірмен басқарғанын анықтады – 777 нөмірі басқа автокөлікке тіркелген болып шықты.
Аманбаев төрт тәулікке қамауға алынып, бір жылға жүргізуші куәлігінен айырылды. Сондай-ақ оған партиялық желі бойынша сөгіс жарияланды.
Осыдан кейін Түркістан облыстық АСК мәслихатқа депутаттық этиканың бұзылуы мәселесін қарау туралы ұсыныс тастады. Алайда депутаттар ЖҚЕ бұзу депутаттық этиканы бұзу болып саналмайды деген шешімге келді. Аманбаевқа тек этика ережелерін сақтау қажеттігі туралы ескерту жасалды.