Мас күйде көлік жүргізгені үшін жүргізуші куәлігінен айыру мерзімін қысқарту: ІІМ ұсынысқа жауап берді
Қазақстанның Ішкі істер министрлігі автокөлікті мас күйде жүргізгені үшін жүргізуші куәлігінен айыру мерзімін қысқарту туралы ұсынысқа жауап берді. Ведомство ұстанымын Үкіметте өткен брифингте министрдің орынбасары Игорь Лепеха мәлімдеді, - деп хабарлайды Tengrinews.kz тілшісі.
"ІІМ ұстанымын білесіздер. Біз оны қайта қараудың қажеті жоқ деп есептейміз. Егер жағдай күрт жақсарып жатса, бірдеңені талқылауға болар еді", - деді Лепеха.
Министрдің орынбасары мас жүргізушілерге қатысты статистиканы келтірді. 2023 жылы полиция осындай 22 мың деректі анықтаса, 2024 жылы - 24,7 мың, 2025 жылы - 25,3 мың жағдай тіркелген. 2026 жылдың басынан бері 17,1 мың мас жүргізуші ұсталған.
"Біз қолданыстағы шараның өте қатаң екенін айтып отырмыз, бірақ ол адамдарды тоқтатар емес - олар бәрібір рөлге отырады. Егер жаза жұмсартылса, бұл көрсеткіштер одан сайын артуы мүмкін", - деді ол.
Игорь Лепеханың айтуынша, өткен жылы мас жүргізушілердің кінәсінен 670 жол-көлік оқиғасы болып, соның салдарынан 56 адам қаза тапқан.
"Мас жүргізушілердің кесірінен қаза тапқан жандардың туған-туыстарынан сұрап көрейікші, олар рақымшылыққа немесе жазаны жұмсартуға қалай қарайды екен. Біздің ұстанымымыз өзгермейді: біз көлік жүргізу құқығынан айыру мерзімін қысқарту мәселесін көтермейміз", - деді министрдің орынбасары.
Бұған дейін Мәжіліс депутаты Николай Арсютин мас күйде көлік жүргізгені үшін жеті жылдық мерзімді қайта қарауды ұсынған болатын. Ол бұл санкцияны ең қатаң шаралардың бірі деп атап, оның жол апатын жасау, салдардың ауырлығы және мастық деңгейін ескермейтінін мәлімдеген еді.
Әкімшілік құқық бұзушылық туралы кодекстің 608-бабына сәйкес, көлікті мас күйде басқарғаны үшін жүргізуші куәлігінен айыру мерзімі мән-жайларға байланысты жеті жылдан тоғыз жылға дейін.