Бишімбаев жазасын өтеп жатқан колонияда жаңа бақылау жүйесі енгізілді

Ұлттық экономика министрлігінің бұрынғы басшысы Қуандық Бишімбаев жазасын өтеп жатқан Степногорскідегі Қылмыстық-атқару жүйесі департаментінің №5 мекемесінде жаңа бақылау жүйесі іске қосылды. Толығырақ Ақмола облысының прокуратурасы мәлімдеді, - деп хабарлайды Tengrinews.kz.
Таратылған мәліметке сәйкес, биыл прокуратура Степногорскідегі Қылмыстық-атқару жүйесі мекемелерінің материалдық-техникалық базасын күшейтуге бюджеттен қаржы бөлу мәселесін шешкен.
Соның нәтижесінде №5 мекемеде кіріп-шығуды бақылайтын заманауи бейнедомофон жүйесі орнатылды. Сотталған адамға шығу қажет болса, ол шақыру түймесін басады. Бұдан кейін кезекші бөлім қызметкері бейнебайланыс арқылы оның кім екенін анықтап, не үшін шығатынын нақтылайды. Есік тек рұқсат берілгеннен кейін ашылады да, артынша автомат түрде жабылады.

"Бұл жүйе сотталғандардың бақылаусыз жүруіне жол бермейді, өткізу тәртібін күшейтеді және қызметкерлер мен нысанның қауіпсіздігін арттырады", - деп түсіндірді прокуратура өкілдері.

Прокуратура өкілдерінің айтуынша, сотталғандардың мекеме ішіндегі қозғалысын реттейтін заманауи бейнебақылау және кіруді басқару жүйелерін енгізу тәртіп пен қауіпсіздікті күшейтудің тиімді тетіктерінің бірі.
Еске салайық, 24 жылға сотталған Ұлттық экономика министрлігінің бұрынғы басшысы Қуандық Бишімбаев жазасын Степногорскідегі Қылмыстық-атқару жүйесі департаментінің №5 мекемесінде өтеп жатыр. Аса ауыр қылмыс жасағандар жазасын өтейтін қауіпсіздігі барынша қатаң мекеме қаладан шамамен 10 шақырым жерде орналасқан.