Атырау тұрғындары қолқаны қабатын иістен тұншығып жатыр: АМӨЗ-ге тексеріс жүргізілмек
"Ұйықтап жатқанда бізді улап жатыр ма?"
Тұрғындардың жағымсыз иіске қатысты алғашқы шағымдары 5 және 6 қыркүйекте пайда болды. Алайда 7 қыркүйекке қараған түні жағдай ушығып, Атыраудың бірнеше ауданынан ауа сапасының нашарлағаны туралы хабарламалар жаппай түсе бастады.
Тұрғындардың бірі әлеуметтік желіде пәтер терезелері жабық болса да, өткір иістен оянып кеткенін айтты.
"Қолқаны қабатын иістен оянып кеттім, терезені ашайын деп сыртқа қарап, көргенімнен шошып кеттім. Алғашқыда газ шығып жатыр ма деп ойладым! Терезелер жабық, бірақ үйде иіс сезіліп тұр, сыртта не болып жатқанын елестете алмаймын. Біз ұйықтап жатқанда улап жатыр ма?" - деп жазды ол.
Пікір қалдырушылар денсаулықтарының сыр бергенін де айтты: кейбірі жөтел мен бас ауруына шағымданған.
Threads.com әлеуметтік желісінен скриншоттар
"Ақ Жайық" мәліметінше, 7 қыркүйекке қараған түні Ақшағала, Жилгородок, Нұрсая және Авангард аудандарынан жағымсыз иіс туралы хабарламалар түскен. Ақшағалада сағат 04:00 шамасында AirKZ күкіртсутегінің концентрациясын текше метрге 24,6 микрограмм деп көрсетті, бұл шекті рұқсат етілген мөлшерден (8 микрограмм) 3,1 есе көп.
Жилгородокта сағат 05:00 шамасында бұл көрсеткіш текше метрге 96,7 микрограммға жетті, бұл нормадан 12 еседен астам жоғары. Авангардта тұрғындар концентрацияның 60 микрограммға дейін жеткені туралы деректерді жариялады.
Билік тексеріс бастады
Тұрғындардың шағымынан кейін Атырау облысының әкімі Болат Ақшолақов тапсырма беріп, тиісті қызметтерге ластану көзін анықтауды және қосымша тексерулер жүргізуді тапсырды.
Мамандар шығарындылардың ықтимал көздерін тексерді. Сондай-ақ әкім "Сасық сай" (Тухлая балка) булану алаңдары мен Атырау мұнай өңдеу зауытының булап-тазалау станциясына барды. Бұдан бөлек, билік ауа сапасын бақылаудың өңірлік жүйесі жобасын әзірлеуді ұйғарды.
Экология департаменті не дейді?
Атырау облысы бойынша экология департаменті 1–2 қыркүйекте мамандар Өркен, Балықшы, Нұрсая және Самал шағын аудандарында ауаның 108 сынамасын зерттегенін хабарлады. Ол кезде ластаушы заттардың шекті рұқсат етілген концентрациясынан асу деректері анықталмаған.
5 қыркүйекте тұрғындар "109" қызметіне ауа сапасына шағымдана бастағаннан кейін, мамандар қаланың бірнеше учаскесінде қосымша өлшеулер жүргізді. Тізімге №23 бекет, Химпоселоктағы Қабдолов пен Ақын Сара көшелерінің қиылысы, Жеңіс саябағының жанындағы №109 "Восток" бекеті, Азаттық даңғылы, 169 мекенжайындағы "Самал" бекеті, Нұрсаядағы "Торговая база" ауданы, сондай-ақ Атырау мұнай өңдеу зауытының санитарлық-қорғау аймағынан тыс жерде орналасқан №13 "Ақшағала" бекеті және АМӨЗ аумағындағы №2 "Пропарка" бекеті енді.
Экологтар ауадағы күкіртсутегі, күкірт диоксиді, көмірсутектер мен көміртек оксидінің мөлшерін тексерді. Барлығы 126 сынама зерттелді, бұл өлшеулердің қорытындысы бойынша да шекті нормадан асу байқалмады.
"5-нен 6-на және 6-нан 7-не қараған түні жүргізілген мониторинг нәтижелері бойынша, қаланың қоныстану аймағындағы "Восток" ауа сапасын бақылау станциясы маңында, сондай-ақ Химпоселок және Привокзальный шағын аудандарында алынған сынамаларда изопропилбензол, диэтилбензол және көміртек оксиді бойынша гигиеналық нормативтердің бірнеше есе артқаны анықталды", - деп хабарлады департамент.
Бұл өлшеулер жүргізілген кезде жел оңтүстік пен оңтүстік-батыстан соққан. Дәл осы бағытта Атырау мұнай өңдеу зауыты орналасқан.
Атырау облыстық экология департаментінің басшысы Асқар Жүсіпов те 31 тамыздан 7 қыркүйекке дейін қалада оңтүстік-шығыс және оңтүстік бағыттағы желдің тұрақты соққанын мәлімдеді.
"Осы бағытта орналасқан ластану көздерінің бірі - Атырау мұнай өңдеу зауыты", - деді ол.
Instagram-дағы бұл жарияланымды көру
АТЫРАУ l ЭКСКЛЮЗИВТІ ЖАҢАЛЫҚТАР ???? (@atpress.kz) жарияланымы
АМӨЗ-ді тәуелсіз сарапшылармен бірге тексереді
Экология департаментінің хабарлауынша, қазіргі уақытта тәуелсіз сарапшыларды тарта отырып, "Атырау мұнай өңдеу зауыты" ЖШС-не қатысты кешенді тексеру тағайындау жұмыстары жүргізіліп жатыр.
Атмосфералық ауаны бақылау жұмыстары жалғасатын болады.