+35 градусқа дейін ыстық және қар: синоптиктер Қазақстандағы қыркүйекке арналған ауа райы болжамын нақтылады
"Қазгидромет" синоптиктері Қазақстандағы 2026 жылдың қыркүйегіне арналған консультативтік ауа райы болжамын нақтылады. Күздің алғашқы айы құбылмалы ауа райымен басталады: батыс пен оңтүстік өңірлерде +35 градусқа дейін ыстық болжанса, солтүстікте, шығыста және орталықта жауын-шашын болып, арты қарға ұласуы және үсік жүруі мүмкін, деп хабарлайды Tengrinews.kz тілшісі.
Күздің басы температураның күрт өзгеруімен таңғалдырады
Болжам бойынша, қыркүйектің басында Қазақстанның батысы мен оңтүстігінде жазғы жылы ауа райы сақталады. Күндіз ауа температурасы +25...+35 градусқа дейін көтерілуі мүмкін.
Сонымен қатар солтүстік, орталық және шығыс аймақтарда салқын күзгі ауа райы болжанады. Түнде температура 0...+8 градусқа дейін төмендеп, кей жерлерде топырақ бетінде 1–3 градусқа дейін үсік жүреді. Күндіз бұл өңірлерде күн +10...+18 градусқа дейін жылынады, кейін температура +22...+30 градусқа дейін көтеріледі.
Оңтүстікте айдың басында түнде +13...+20, күндіз +25...+35 градус болады. Оңтүстік-шығыста түнгі температура +10...+18, күндіз +20...+28-ден +25...+33 градусқа дейін жетеді.
Бұл ретте қыркүйектің басында солтүстік, орталық және шығыс облыстарда жауын-шашын болуы ықтимал. Жаңбырдың қарға ұласуы, сондай-ақ желдің күшеюі де жоққа шығарылмайды.
Күннің ыстығы суыққа ауысады
Бірінші онкүндіктің ортасында Қазақстан аумағының басым бөлігінде негізінен жауын-шашынсыз ауа райы болжанады және температура айтарлықтай көтеріледі.
Күн елдің батысында, солтүстік-батысында және оңтүстік-батысында күндіз +25...+35 градусқа дейін қызуы мүмкін.
Алайда бірінші онкүндіктің екінші жартысында кезекті солтүстік-батыс циклоны тұрақсыз ауа райын алып келеді. Жауын-шашын мен желдің күшеюі болжанады, одан кейін ыстық қайта бастайды.
Қыркүйектің екінші жартысында үсік жүруі мүмкін
Айдың екінші және үшінші онкүндігінде синоптиктер температураның оң мәндерден үсікке дейін айтарлықтай ауытқуын болжайды.
Батыс және солтүстік-батыс аймақтарда түнде температура 0...+5 градусқа дейін төмендеуі мүмкін, ал топырақ бетінде 3 градусқа дейін үсік жүруі ықтимал. Күндіз температура біртіндеп +27...+35 градустан +12...+22 градусқа дейін төмендейді.
Солтүстікте, орталықта және шығыста түнде де 0-ден +5 градусқа дейін жылы болады, кей жерлерде 3 градусқа дейін үсік жүруі мүмкін. Күндіз температура +20...+30 градустан +8...+17 градусқа дейін төмендеуі ықтимал.
Елдің оңтүстік жартысында ай бойы түнгі температура +2...+10 градустан +12...+17 градусқа дейін ауытқиды, ал таулы аймақтарда 1–6 градусқа дейін үсік жүруі мүмкін. Күндіз температура +25...+33 градустан +15...+22 градусқа дейін төмендейді.
Жалпы қыркүйек қандай болады?
Жалпы алғанда, қыркүйекте Қазақстан аумағының басым бөлігінде күннің орташа айлық температурасы климаттық норма шамасында болады деп болжанады.
Батыс Қазақстан, Атырау облысының батысы және Маңғыстау облысы ерекшелік болады - бұл өңірлерде температура нормадан шамамен 1 градусқа жоғары болады деп болжанады.
Жауын-шашын мөлшері негізінен климаттық норма шегінде болады. Елдің қиыр батысында, солтүстік-батысында және солтүстік-шығысында жауын-шашын әдеттегіден көп болады деп болжанады. Ал оңтүстік және оңтүстік-батыс өңірлерде жауын-шашын мөлшері нормадан аз болады.
Синоптиктер бір айға арналған болжамның консультативтік екенін атап өтеді. Синоптикалық жағдайдың өзгеруіне қарай ол түзетіліп, қысқа мерзімді кезеңдерге арналған болжамдармен нақтыланады.