Ұлдана Мырзуанның өліміне қатысты сот процесі тікелей эфирде көрсетіледі
Астанада фельдшер Ұлдана Мырзуанның қазасына қатысты сот отырыстары тікелей эфирде көрсетіледі. Бұл туралы Жоғарғы соттың Telegram-арнасында хабарланды, деп жазады Tengrinews.kz.
Бүгін Астанада қызметтік міндетін атқару кезінде қаза тапқан фельдшер Ұлдана Мырзуанның ісі бойынша сот процесі басталды.
"Сот ісіне қоғамдық қызығушылықтың жоғары болуын, сот процесіне қатысушылардың пікірін, сондай-ақ жәбірленуші тараптың өтінішін ескере отырып, сот аталған іс бойынша ашық сот отырыстарының онлайн-трансляциясын ұйымдастыру туралы шешім қабылдады", - делінген хабарламада.
Сот процесінің онлайн-трансляциясын Жоғарғы соттың YouTube-арнасынан көруге болады.
Ұлдана Мырзуанның қазасы
Еске салайық, 2025 жылғы 8 қарашада Астанадағы Тәуелсіздік даңғылы, 24 Б мекенжайында орналасқан тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.
Бір пациенттің жағдайы өте ауыр болып, оған ота жасалды. Тағы екеуі жансақтау бөлімінде жатты, дәрігерлер олардың жағдайын ауыр деп бағалады. Қалған екеуі бөлімшеге ауыстырылды, олардың жағдайы тұрақты деп бағаланды.
Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Ол жерде бала, оның анасы және олардың туысы болған. Ұлдана зардап шеккендерге қарай жүгірген кезде, "үстіне кірпіштер мен кондиционердің бекіткіш құрылғысы құлаған". 18 қарашада ол ауруханада қайтыс болды.
Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейінірек істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".
Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы біздің материалда.
Фото: ©️ Tengrinews.kz / Айсұлтан Құлшманов
Бұған дейін ІІМ тергеу амалдары жалғасып жатқанын және ведомство тағайындалған сараптама қорытындыларын күтіп отырғанын мәлімдеген болатын.