Қазақстандықтар қоныс аударған кезде тұрғын үйге 7 миллион теңгеге дейін төленеді
Қазақстанда жұмыс күші жетіспейтін өңірлерге ерікті түрде қоныс аудару бағдарламасы жаңартылып жатыр. Енді қатысушылар баспана сатып алу үшін 7 миллион теңгеге дейін қаражат ала алады, деп хабарлайды TengriHome Еңбек және халықты әлеуметтік қорғау министрлігіне сілтеме жасап.
Тұрғын үй сатып алуға 7 миллион теңгеге дейін
Бағдарламадағы басты өзгеріс - экономикалық ұтқырлық сертификаты сомасының ұлғаюы. Оның ең жоғары мөлшері енді 1 625 АЕК-ті немесе шамамен 7 миллион теңгені құрайды.
Бұл қаражатты бағдарлама қатысушысы қоныс аударған өңірден баспана сатып алуға жұмсай алады.
Тағы қандай төлемдер қарастырылған?
Сертификаттан бөлек, қоныс аударушыларға қолдаудың өзге де шаралары көрсетіледі. Мемлекет көшуге субсидия төлейді, тұрғын үйді жалдау мен коммуналдық қызмет шығындарын өтейді, сондай-ақ жұмысқа орналасуға көмектеседі.
Сонымен қатар жұмысты көшпес бұрын да таңдауға болады. Ол үшін қабылдаушы өңірлердің өкілдері бос жұмыс орындары жәрмеңкесін өткізеді, сондай-ақ жұмыс берушіні қашықтан таңдау мүмкіндігі де қарастырылған.
Енді кімдер қатыса алады?
Бағдарлама бұдан да көп қазақстандыққа қолжетімді болды. Егер бұған дейін ол негізінен жұмыссыздарға бағытталса, енді мемлекеттік қолдауды сұранысқа ие мамандар мен шаруа және фермер қожалықтарының басшылары да пайдалана алады.
Өтінімді қалай беруге болады?
Өтінім беруге, қоныс аудару картасымен танысуға, өңірлерде қандай мамандар қажет екенін білуге және лайықты бос жұмыс орнын таңдауға migration.enbek.kz порталы арқылы онлайн мүмкіндік бар.
Қанша адам қоныс аударды?
Ерікті түрде қоныс аудару бағдарламасы 2017 жылдан бері іске асырылып келеді. Осы уақыт ішінде 73,9 мың адам бағдарлама қатысушысы атанды, оның 31 мыңы мемлекеттік қолдау шараларының арқасында тұрақты жұмысқа орналасты.