Қазақстандықтарға ыстықтың жаңа толқыны туралы ескертілді

"Қазгидромет" синоптиктері 30, 31 шілде мен 1 тамызға арналған ауа райы болжамын ұсынды, деп хабарлайды Tengrinews.kz.
Жақын күндері Қазақстанда аптап қайта күшейеді. Синоптиктердің болжамы бойынша, оңтүстік өңірлерде ауа температурасы +44 градусқа дейін көтеріледі, ал бірқатар облыста нөсер жаңбыр жауып, найзағай ойнап, бұршақ түсуі мүмкін.
Қай жерде нөсер жаңбыр жауады?
"Қазгидромет" мәліметінше, 30 шілде мен 1 тамыз аралығында елдегі ауа райын атмосфералық фронталды бөліктер анықтайтын болады. Республиканың басым бөлігінде өткінші жаңбыр жауып, найзағай ойнайды, жел күшейіп, кей жерлерде бұршақ жаууы ықтимал. Ең қатты жауын-шашын Қазақстанның солтүстік-батысында, солтүстігінде және шығысында күтіледі.
Сонымен қатар оңтүстік пен оңтүстік-шығыста негізінен құрғақ ауа райы сақталады. Бұл аймақтарда Иран аумағынан келетін ыстық ауа массалары үстемдік етуін жалғастырады.
Қай өңірлерде қатты ыстық болады?
Кейбір аймақтардағы жауын-шашынға қарамастан, елдің басым бөлігінде ауа температурасы көтеріле береді. Синоптиктердің болжамынша, күндіз ауа температурасы мынадай деңгейге дейін жылынады:

орталықта, шығыста және оңтүстік-шығыста +33…+41 градусқа дейін;
оңтүстікте +35…+44 градусқа дейін.

Тек батыс, солтүстік-батыс және солтүстік өңірлерде аптап ыстықтан кейін 1 тамызда температураның аздап төмендеуі күтіледі - күндіз +25…+35 градусқа дейін.