Стадионда аяғын орындықтың арқалығына қойған Астана тұрғынына 86 мың теңге айыппұл салынды
Тәртіпбұзушы елорданың 28 жастағы тұрғыны болып шықты. Матч барысында ер адам аяқ киімін шешіп, аяғын алдындағы орындықтың арқалығына қойғаны анықталды. Ол осы әрекетімен айналасындағыларға құрметсіздік танытып, көрермендердің наразылығын тудырған.
Қоғамдық тәртіпті бұзып, айналасындағыларға анық құрметсіздік көрсеткені үшін құқықбұзушы ұсақ бұзақылық бабы бойынша әкімшілік жауапкершілікке тартылды. Сот шешімімен оған 20 АЕК (86 500 теңге - ред. еск.) мөлшерінде айыппұл салынды.
Instagram-дағы бұл жарияланымды көру
Астана қаласының Полиция департаменті (@police__astana) жариялаған жазба
Полиция қоғамдық орындарда өзін мәдениетті ұстау, тәртіп сақтау және өзгенің құқығы мен жайлылығын құрметтеу қоғамдық тәртіптің негізі екенін еске салады.
Сондай-ақ тәртіп сақшылары азаматтарды қоғамдық әдеп қағидаларын сақтауға, айналадағы адамдарға құрметпен қарауға, сондай-ақ спорттық және өзге де бұқаралық іс-шараларда тәртіпті сақтауға шақырды. Әрбір азаматтың мәдениетті мінез-құлқы – баршаға қауіпсіз әрі жайлы орта қалыптастырудың кепілі.