“Дүрбелеңге түсудің қажеті жоқ“: Ауыл шаруашылығы министрлігі нан бағасына қатысты пікір білдірді

Ауыл шаруашылығы вице-министрі Азат Сұлтанов еліміздің бірқатар өңіріндегі құрғақшылыққа байланысты қазақстандықтарға азық-түлік бағасының өсуін күту керек пе деген сұраққа жауап берді. Тиісті сұрақ бүгін Үкіметте өткен брифингте қойылды, деп хабарлайды Tengrinews.kz тілшісі.
"Өнім жиналғаннан кейін біз қандай баға төлейміз? Бұл бағаның өсуіне әкеп соқтырмай ма?", - деген сауал қойылды.
Сұлтановтың айтуынша, қарапайым тұтынушылар мен фермерлер "жақсы жыл" ұғымын әртүрлі түсінеді. Кейде диқандарға өнім аз шыққан жыл тиімдірек болуы мүмкін.

"Біз үшін жақсы жыл деген өнімнің мол болуы болса, олар үшін көбінесе өнімнің аз болғаны жақсы жыл болып саналады, өйткені олар өсірген өнімнің ішкі нарықтағы бағасы жоғары болады. Тиісінше, мұның бәрі әлеуметтік маңызы бар тауарларды өндірудің өзіндік құнына әсер етеді. Бұл ретте, біз осыдан 4 жыл бұрын байқаған астықтың тоннасына 180 мың теңге бағасында да, қазіргі 90 мың теңге бағасында да әлеуметтік нанның бағасы сөрелерде 110 теңге деңгейінде өзгеріссіз қалып отырғанын атап өткім келеді", - деді Азат Сұлтанов.

Оның айтуынша, мемлекет бұл бағаны сақтап тұру үшін барлық қажетті шараны қабылдап жатыр.

"Сондықтан нансыз қаламыз немесе нан қымбат болады деп қауіптенуге әлі ерте деп ойлаймын, бұған бола дүрбелеңге түсудің қажеті жоқ. Дегенмен, қандай да бір күтпеген жағдай болса, мемлекет тарапынан тежеу шаралары қабылданады. Қазіргі жағдайда алаңдауға негіз жоқ деп есептейміз", - деп толықтырды вице-министр.

Еске салсақ, мамырда Алматыда әлеуметтік нан бағасы 2027 жылға дейін бекітілді. "Алматы" ӘКК мен нан-тоқаш зауыты арасындағы келісімге сәйкес, бір бөлке нанның бағасы 130 теңге болады, ал шекті сауда үстемесі 15 пайыздан аспайды.
Бұл шаралар 2027 жылдың мамырына дейін күшінде болады.
Тағы оқыңыз: Қант бағасы не болмақ: Ауыл шаруашылығы министрлігі түсіндірді