Ғалымдар адамдар аз сөйлей бастағанын анықтады
Кейінгі жылдары адамдар аз сөйлейтін болған. Ғалымдар айтуынша, жыл сайын адамдар күніне орта есеппен 338 сөзге аз сөйлейді екен, деп хабарлайды Tengri Life тілшісі Naked Science-ке сілтеме жасап.
Канзас-Ситидегі Миссури университеті мен Аризона университетінің зерттеушілері 10 мен 94 жас аралығындағы 2197 адамның аудиожазбаларын зерделеді. Авторлар 2005-2019 жылдар аралығында жалпы саны 22 зерттеу жүргізген.
Бақылау барысында күнделікті айтылатын сөздердің саны жыл сайын орта есеппен 338-ге азайып отырған. 2005-2019 жылдар аралығында адамдардың күнделікті сөйлеу көлемі 28 пайызға қысқарған. Көрсеткіш шамамен 16 600-ден 11 900 сөзге дейін төмендеген.
Демек, адамдар күніне орта есеппен 338 сөзге аз сөйлесе, бір жылда бұл айырмашылық 123 370 сөзді құрайды.
Зерттеушілер әзірге бұл тенденцияның нақты себебін түсіндіре алмай отыр. Болжамдардың біріне сәйкес, бұл технологияның дамуымен және мәтіндік хабарламалардың танымалдылығымен байланысты болуы мүмкін.