NVIDIA 10 минг ходимига GPT-5.5 моделидан фойдаланиш имконини берди
"Nvidia" компанияси ўзининг 10 000 нафарга яқин ходими учун "OpenAI" компаниясининг энг сўнгги GPT-5.5 моделига асосланган "Cодех" агентлик воситасини жорий қилди. Ушбу қарор Хитойнинг "DeepSeek" лабораторияси ўзининг янги V4 моделига "Nvidia" ва AMD компаниялари учун муддатидан олдин кириш ҳуқуқини беришни рад этганидан сўнг қабул қилинди. Америка технология гиганти бунга жавобан ўз иш жараёнларига маҳаллий ишланмаларни интеграция қилишни тезлаштирди. Бу ҳақда Shazoo.ru хабар беради.
"Cодех" дастурлаш учун мўлжалланган агентлик иловаси бўлиб, ҳозирда унга GPT-5.5 моделини қўллаб-қувватлаш функцияси қўшилмоқда. "Nvidia" корпоратив блогида таъкидланишича, ушбу восита аллақачон сезиларли самарадорликка эришиш имконини берди. Илгари бир неча кун давом этган хатоларни тузатиш жараёнлари эндиликда бир неча соат ичида якунланмоқда. Шунингдек, ҳафталаб вақт талаб қиладиган мураккаб код базалари устидаги тажрибалар бир кечада ўз ечимини топмоқда.
Хавфсизликни таъминлаш мақсадида ҳар бир ходимга агентни ишга тушириш учун алоҳида булутли виртуал машина ажратилди. "Cодех" корпоратив маълумотларни ўқиш имкониятига эга бўлса-да, уларни тўғридан-тўғри таҳрирлаш ёки ўчириш ҳуқуқига эга эмас. Бу тизимнинг изоляция қилинган муҳитда хавфсиз ишлашини таъминлайди. Ҳозирда ушбу воситадан нафақат муҳандислар, балки юридик, маркетинг, молия ва кадрлар бўлими ходимлари ҳам фойдаланмоқда.
"Nvidia" ва "OpenAI" ўртасидаги бундай яқин ҳамкорлик кутилган ҳолат эди. Сэм Альтман бошчилигидаги компания технологик ва молиявий жиҳатдан "Nvidia" инвестицияларига таянади. Мутахассисларнинг фикрича, бу қадам сунъий интеллект соҳасидаги глобал пойгада АҚШ компанияларининг ўзаро жипслашувини янада кучайтиради.