Нұрай ісі: күдікті мәжбүрлеп емдеуден кейін тергеу изоляторына қайтарылады
Шымкент полицейлері 21 жастағы Нұрай Серікбайды өлтірді деген күдіктінің Алматы облысындағы психикалық ауруханаға ауыстырылуына қатысты пікір білдірді, - деп хабарлайды Tengrinews.kz.
Жаңа деректер
Баспасөз қызметі қоғамда үлкен резонанс тудырған істің тергелу барысы туралы айтып берді. Полиция мәліметінше, күдікті медициналық қорытындылар негізінде мамандандырылған мекемеге орналастырылған.
"Екі рет жүргізілген сот-психиатриялық сараптама қорытындысы бойынша күдіктіден психикалық ауытқулар анықталды, соған байланысты ол мамандандырылған мекемеге мәжбүрлеп емдеуге жіберілді", – деп хабарлады баспасөз қызметі.
Шымкент ПД өкілдері емдеу курсы аяқталғаннан кейін күдікті тергеу амалдарын жалғастыру үшін қайтадан тергеу изоляторына жіберілетінін айтты.
Адвокат пен марқұмның ағасы не дейді?
Бұған дейін қаза тапқан қыздың отбасылық адвокаты Аянхан Омаров 28 жастағы күдіктінің Алматы облысы Талғар ауданы Ақтас ауылындағы қарқынды бақылаудағы мамандандырылған типтегі республикалық психиатриялық ауруханаға орналастырылғанын хабарлаған болатын.
Адвокаттың айтуынша, ер адамның ақыл-есінің дұрыстығы туралы түпкілікті шешім тек емдеу шаралары аяқталып, барлық сараптамалар жүргізілгеннен кейін қабылданады. Сонымен қатар ол бұған дейін Шымкентте күдіктінің медициналық есепте тұрмағанын нақтылады.
Марқұмның ағасы Сұлтан Серікбай тілшімен әңгімелесу барысында күдікті жауапкершіліктен қашуға тырысып жатыр ма деген қаупі барын білдірді.