УКМК текшерүүдөн кийин үч медресе жабылганын билдирди
Улуттук коопсуздук боюнча мамлекеттик комитет (УКМК) 19 диний билим берүү мекемеси текшерилип, ишмердик жүргүзүүгө уруксат документтери жок үч медресе жабылып, ыкчам-тергөө иштери башталганын билдирди.
Атайын кызматтын маалыматында текшерүү салттуу эмес диний агымдардын идеяларынын жайылышын, диний-экстремисттик жана башка радикалдык уюмдардын жашы жете элек балдарды азгыруу иш-аракеттерин алдын алуу максатында жүргүзүлгөн.
Ошондой эле санитардык-эпидемиологиялык эрежелерди одоно бузган деген негизде дагы эки экөөнө айып пул салынып, иши убактылуу токтолуп, төрт медресеге майда кемчиликтерди жоюу боюнча эскертүү берилди.
УКМК айрым медреселердеги диний адабияттар талап кылынган текшерүүдөн өтпөй калгандыктан, Кыргызстан мусулмандарынын дин башкармалыгына карап чыгууга жана бекитүүгө жөнөтүлгөнүн кошумчалады.
Окуучулардын арасында ата-энеси жок балдар, ошондой эле мигранттардын балдары бар экени аныкталып, тиешелүү мамлекеттик мекемелерге маалымат берилген. (BTo)