Трамп Ҳормузни “Трамп бўғози” деб атади
АҚШ Президенти Доналд Трамп “Келажак инвестициялари ташаббуси” тадбирида нутқ сўзлар экан, Ҳормуз бўғозини адашиб “Трамп бўғози” деб атаган.
“Биз ҳозир музокаралар олиб боряпмиз ва натижага эришиш яхши бўларди, лекин бунинг учун улар “Трамп бўғози”ни очишлари керак. Демоқчи бўлганим Ҳормуз эди. Мени кечиринг, жуда афсусдаман, қандай даҳшатли хато. Сохта янгиликлар буни тасодиф дейди. Аммо менда деярли тасодифлар бўлмайди”, деган Оқ уй раҳбари.
Ушбу ҳолат тадбир иштирокчилари орасида кулгу ва қизиқиш уйғотди. Айримлар буни оддий тил сурилиши деб баҳолаган бўлса, бошқалар эса Трампнинг ўзига хос услуби ва нутқ давомидаги импровизацияси билан боғлади.
Кузатувчиларнинг фикрича, бу каби ҳолатлар сиёсий нутқларда камдан-кам учрамайди, аммо Трампнинг бу галги хатоси ижтимоий тармоқларда тезда тарқалиб, кенг муҳокамаларга сабаб бўлди. Шу билан бирга, Ҳормуз бўғози каби стратегик аҳамиятга эга ҳудуд тилга олингани сабабли, бу гаплар халқаро сиёсий муҳитда ҳам эътибордан четда қолмади.