Ўзбекистонда автомобиль харидлари 14 фоизга ўсди
2026 йилнинг январь–февраль ойларида Ўзбекистонда жами 57 512 дона янги автомобиль сотилди. Бу ҳақда “ЎзАвтосаноат” компанияси томонидан тақдим этилган инфографикада маълум қилинган.
Бозордаги асосий улуш одатдагидек UzAuto Motorsга тегишли бўлиб, компания 29 943 дона автомобил сотган ва умумий улушнинг 52,1 фоизини эгаллаган. Иккинчи ўринда 15 666 дона автомобили билан Khorezm Auto (27,2 фоиз), ундан кейин ADM Jizzakh 7 202 дона (12,5 фоиз) ва BYD Uzbekistan Factory 4 621 дона (8 фоиз) автомобил билан жойлашган. Asaka Motors эса 80 дона автомобил билан бозордаги 0,1 фоизни ташкил этган.
Брендлар кесимида эса Chevrolet етакчиликни сақлаб қолган — жами 45 609 дона автомобил сотилган. Кейинги ўринларда Kia (4 611 дона), BYD (4 621 дона), Chery (1 368 дона) ва Haval (1 223 дона) қайд этилган. Hyundai эса бозорда 80 дона автомобил билан энг кам улушга эга бўлган.
Моделлар бўйича энг кўп сотилган автомобил Cobalt бўлиб, 15 305 дона харидор топган. Ундан кейин Damas (11 254 дона), Tracker (7 655 дона), Onix (6 799 дона), шунингдек Labo (4 412 дона) ва Sonet (3 912 дона) жойлашган.
Таққослаш учун, 2025 йилнинг январь–февраль ойларида Ўзбекистонда 50 373 дона автомобил сотилган эди. Демак, бир йил ичида автомобиль бозори қарийб 7 минг донага ёки тахминан 14 фоизга ўсган. Шу билан бирга, бозорнинг асосий улуши ва энг кўп сотилган брендлар UzAuto Motors ва Chevrolet билан бир хил ҳолатни сақлаб қолмоқда.