НАТО иттифоқчилари мудофаа харажатларини оширди
НАТОнинг Европадаги иттифоқчилари ва Канада 2025 йилда мудофаа харажатларини 2024 йилга нисбатан 19,6 фоизга оширди, дейилади альянснинг 26 март куни бош котиб Марк Рютте томонидан эълон қилинган йиллик ҳисоботида. Кескин ўсишга қарамай, уларнинг умумий ҳарбий харажатлари барибир Қўшма Штатларникидан паст бўлиб қолди. Бу ҳақда Dw.com хабар беради.
Ҳисоботда айтилишича, НАТОнинг барча 32 аъзоси 2025 йилда мудофаага ЯИМнинг камида 2 фоизини сарфлаб, альянснинг муҳим мезонига эришди. Етти давлат — Польша, Литва, Латвия, Эстония, Дания, Норвегия ва Қўшма Штатлар — ЯИМнинг 3 фоизидан ҳам ошди. Польша, Литва ва Латвия ҳар бири 3,5 фоиздан кўпроқ сарфлади, бу даражага НАТО аъзолари 2035 йилга бориб жамоавий тарзда эришиши кутилмоқда.
Германия 2025 йилда мудофаага ЯИМининг 2,39 фоизини сарфлади. Мутлақ кўрсаткичларда Берлин фақат Вашингтондан кейин иккинчи бўлди. Ўтган йили НАТО томонидан сарфланган 1,63 триллион долларнинг 980 миллиард доллари Қўшма Штатлар ҳиссасига тўғри келди, Германия эса 120 миллиард доллардан кўпроқ ҳисса қўшди. Бошқа барча иттифоқчиларнинг умумий харажатлари рекорд даражадаги 574 миллиард долларга етди.
2025 йил июнида НАТО аъзолари 2035 йилга бориб хавфсизлик билан боғлиқ умумий харажатларни ЯИМнинг 5 фоизигача оширишга келишиб олди. Ушбу режа бўйича 3,5 фоиз асосий мудофаа эҳтиёжларига йўналтирилади, яна 1,5 фоиз эса терроризмга қарши саъй-ҳаракатлар ва ҳарбий амалиётларни қўллаб-қувватлаши мумкин бўлган инфратузилмани молиялаштиради. Таҳлилчилар фикрича, Европадаги НАТО мамлакатлари қайта қуролланиш мақсадларига эришиш ва АҚШ ҳарбий таъминотидаги ҳар қандай қисқаришни қоплаш учун 2035 йилга бориб тўғридан тўғри мудофаа инвестицияларини қарийб 2,2 триллион еврогача ошириши керак бўлиши мумкин.