Қазақстандықтардың қарызын жаппай кешіру: жол ережесін бұзғандарға не болады?

Жол қозғалысы ережесін бұзушыларға амнистия жасалмауы тиіс. Мәжіліс депутаты Бақытжан Базарбек осындай пікір білдірді, - деп хабарлайды Tengri Auto.
Алматы мен Қазақстанның өзге де қалаларында жол ережесін бұзу деректері мен резонанс тудырған жол-көлік оқиғалары жиілеген тұста депутатқа жазаланған жүргізушілердің әкімшілік амнистияға ілігу-ілікпеуі туралы сұрақ қойылды. Базарбек заң жобасының Мәжіліске әлі түспегенін, алайда құжат келген кезде жұмыс тобына кіріп, мұндай заң бұзушыларға амнистия жасауға қарсы шығатынын айтты.

"Әзірге ештеңе айта алмаймын, өйткені заң жобасының өзі әлі түскен жоқ. Біз оны әлі көргеніміз жоқ. Ол Мәжіліске ресми түрде келуі тиіс – бұл не үкіметтік заң жобасы, не депутаттардың бастамасымен дайындалған жоба болады. Сол кезде мен міндетті түрде жұмыс тобының құрамына кіремін. Менің жеке ұстанымым – мен (ЖҚЕ бұзушыларға амнистия жасауға – ред. еск.) қарсымын. Олар (жүргізушілер – ред. еск.) қолданыстағы заңнама бойынша қатаң жазалануы тиіс", - деді Бақытжан Базарбек.

Журналистер мас күйінде ұсталған жүргізушілердің ішімдік ішуін қоймағанын айтты. Депутат бұл пікірмен келісіп, "кем дегенде, біз қатаң жауапкершілікті сақтап қаламыз" деп қосты.

"Осындай жауапкершілік болған кезде, әр адамның басында "ішімдік ішсем, 7 жылға жүргізуші куәлігінен айырыламын" деген қауіп тұрады. Сондықтан заңның жазалау функциясы нақты болуы керек. Бұл жай ғана адамды жазалау емес, бұл автомобильдің үлкен қауіп төндіретінін білдіреді, адам шығынын көріп отырмыз. Құрбандар мұнымен шектелмейді. Біз нақ осындай қатаң жазалау шаралары арқылы қатаң әрі нақты әрекет етуіміз керек", - деп толықтырды депутат.

Бұған дейін Бақытжан Базарбек Алматыдағы адам өліміне әкеп соққан жол-көлік оқиғаларына қатысты пікір білдіріп, "ішкі істер органдарында ауқымды тазарту" жүргізу қажеттігін айтқан болатын.
Мән-жай
17 наурызда Президент Қасым-Жомарт Тоқаев әкімшілік амнистия жасалатынын хабарлаған болатын.
Премьер-министр Олжас Бектенов Ішкі істер министрлігіне, Әділет министрлігі мен Бас прокуратураға екі апта ішінде амнистия механизмі бойынша ұсыныс енгізуді тапсырған болатын.
ІІМ мәліметінше, амнистия аясында жеке тұлғалардың төленбеген айыппұлын толық немесе ішінара есептен шығару жоспарланған.
Амнистия тек азаматтар мен мемлекеттің қауіпсіздігіне қатер төндірмейтін құқық бұзушылықтарға қатысты болады.