Жарқўрғон туманига янги ҳоким тайинланди
27 март куни бўлиб ўтган Халқ депутатлари туман Кенгашининг навбатдан ташқари сессиясидан сўнг Жарқўрғон туманига янги ҳоким тайинланди. Сурхондарё вилояти ҳокимлиги матбуот хизматига кўра, қарор сессияда маҳаллий депутатлар иштирокида қабул қилинди.
Йиғилишда Элмурод Авазов Жарқўрғон тумани ҳокими лавозимидан озод этилгани маълум қилинди. Шундан сўнг вилоят ҳокими ушбу лавозимга Илҳом Очилович Сапаров номзодини таклиф этди. Туман кенгаши аъзолари номзодни кўриб чиқиб, уни маъқулладилар.
Илҳом Сапаров 1975 йили Термиз туманида туғилган. У 2002 йили Термиз давлат университетида бакалавр босқичини тамомлаган, кейин эса 2011 йили шу ернинг ўзида магистратура даражасини олган. Меҳнат фаолияти давомида у Сурхондарё вилоятининг ўрта махсус ва касб-ҳунар таълими, халқ таълими ҳамда маданият бошқармаларида раҳбарлик лавозимларида ишлаган.
Мазкур тайинловга қадар Сапаров Сурхондарё вилояти ҳокимининг ўринбосари лавозимида фаолият юритиб келган. Унинг Жарқўрғон туманига ўтиши давлат хизматидаги фаолиятида янги босқични англатади.