Қандастар жұмысқа орналасуға міндеттеледі
Қандастар қоныстанған өңірлерінде жұмысқа орналасуға міндеттеледі. Еңбек және халықты әлеуметтік қорғау министрлігі тиісті түзетулер дайындады, - деп хабарлайды Tengrinews.kz.
Бұйрық жобасы қоныс аудару бағдарламаларының тиімділігін арттыру және азаматтардың жаңа өңірлерде тұрақтап қалуы үшін әзірленген. Министрлік ресми жұмыспен қамтылмау қоныс аударушылардың тұрақтану деңгейін төмендетіп, қайта көшіп кетуіне септігін тигізетінін және жергілікті бюджетке түсетін салмақты арттыратынын атап өтті.
"Осыған байланысты қоныстанған өңірде жұмыспен қамтылу дерегін растау және әлеуметтік аударымдарды жүзеге асыру арқылы міндетті түрде жұмысқа орналасу талабын белгілеу көзделіп отыр", - делінген жобада.
Бұйрық жобасы "Ашық НҚА" порталында 2026 жылдың 6 сәуіріне дейін жария талқылау үшін орналастырылған.
Айта кетейік, Еңбекмині мәліметінше, 2026 жылы тарихи отанына 3 335 этникалық қазақ оралып, қандас мәртебесін алған. Жалпы, 1991 жылдан бері республикаға 1 миллион 168,2 мың этникалық қазақ оралды.