Баҳодир Жалолов ва қизи Ранияни яқинлари тантанали кутиб олишди (видео)

Ўзбекистонлик профессионал, чемпион боксчи Баҳодир Жалолов ота бўлганини маълум қилди. У қизалоқ фарзандини бугун хонадонига олиб келгани акс этган видеони ўз саҳифасига жойлади.

Чемпион пост остида қуйидаги самимий сўзларни ёзиб қолдирди:

“Биргина туйғу бор — у сени бутунлай бошқа одамга айлантиради. Бугун мен ўша туйғуни ҳис қилдим — оталик.”

Миттигина жажжи меҳмонга ота-онаси Рания деб исм қўйишди. Ушбу қувончли лаҳзада боксчининг барча яқинлари иштирок этди.

Кичкина меҳмонни тантанали кутиб олиш жараёнида хонандалар Ойбек ва Нигора “Қизим” номли қўшиқларини ижро этишди. Ушбу лавҳалар ҳам уларнинг ижтимоий тармоқлардаги саҳифаларида эълон қилинди.

Хонанда Нигора пост остида: “Чемпионимизга жажжи фаришта малика муборак бўлсин”, — дея ёзиб қолдирди.

Кузатувчилар эса боксчини табриклаб, илиқ ва самимий тилаклар билдиришмоқда. Улар митти қизалоққа узоқ умр, мустаҳкам соғлиқ ва бахт тилаб, унинг келажакда солиҳа, билимли ва ҳатто отасидек чемпион бўлишини ҳам тилашмоқда.