Иран Қатардың ең ірі газ өңдеу зауытына шабуыл жасады
Қатардың QatarEnergy энергетикалық алпауыты Иранның Рас-Лаффан өнеркәсіптік қаласына жасаған зымыран шабуылы "айтарлықтай залал" келтіргенін мәлімдеді, - деп хабарлайды Tengrinews.kz тілшісі Al Jazeera мәліметіне сілтеме жасап.
Компания зауыт жұмысшылары арасында құрбандар жоқ екенін айтты. Қатар Ішкі істер министрлігі оқиға орнындағы өрт алдын ала мәлімет бойынша бақылауға алынғанын хабарлады.
Иран Парсы шығанағы аймағындағы мұнай-газ нысандарына шабуыл жасалатынын мәлімдегеннен кейін бірнеше сағат өткен соң соққы жасалды. Бұл Оңтүстік Парс газ кен орнына Израиль жасаған шабуылға жауап екені айтылды.
Иран Қатардағы "Месаид" мұнай-химия кешеніне, "Месаид" холдингтік компаниясына және "Рас-Лаффан" мұнай өңдеу зауытына; Сауд Арабиясындағы "Самреф" мұнай өңдеу зауыты мен "Джубайль" мұнай-химия кешеніне; сондай-ақ Біріккен Араб Әмірліктеріндегі "Әл-Хосн" газ кен орнына шабуыл жасалуы мүмкін екенін ескертті.
Қатар Сыртқы істер министрлігі Иран елшілігінің әскери және қауіпсіздік қызметі өкілдерін, сондай-ақ олардың бүкіл қызметкерлерін "персона нон грата" деп жариялады.
СІМ олардан Қатар аумағынан 24 сағат ішінде шығып кетуді талап еткенін айтып, бұл шешім Иранның шабуылдарына жауап ретінде қабылданғанын қосты.
"Қатар бұл шабуылды жағдайды ушықтыратын қауіпті қадам, өз егемендігін өрескел бұзу және ұлттық қауіпсіздікке төнген тікелей қатер деп санайды", - делінген СІМ мәлімдемесінде.
Дохадан солтүстік-шығысқа қарай 80 шақырым жерде орналасқан Рас-Лаффан кешені - әлемдегі сұйытылған табиғи газ (СТГ) өндіретін ең ірі кәсіпорын және ол әлемдік СТГ жеткізілімінің шамамен 20 пайызын қамтамасыз етеді. Зауыт өз өнімін Азия және Еуропа нарықтарына шығарады.
Сауд Арабиясының Қорғаныс министрлігі мәліметінше, сәрсенбі күні елдің әуе шабуылына қарсы қорғаныс жүйелері Эр-Рияд бағытына ұшырылған төрт баллистикалық зымыранды, сондай-ақ елдің шығыс аймағына бағытталған екі зымыранды атып түсірген.
БАӘ Қорғаныс министрлігі оның әуе шабуылына қарсы қорғаныс жүйелері Ираннан ұшырылған 13 баллистикалық зымыран мен 27 дронның бетін қайтарғанын мәлімдеді.
Бұған дейін Қатар да, БАӘ де Израильдің Иранның "Оңтүстік Парс" газ кен орнына жасаған әуе соққыларын айыптаған болатын.