Трамп «ўзга сайёраликлар» ҳақидаги ҳужжатларни махфийликдан чиқармоқчи
АҚШ президенти Доналд Трамп номаълум учар жисмлар (НУЖ), UAP ва ердан ташқари ҳаётга оид давлат ҳужжатлари бўйича “ёпиқ папкалар”ни очиш нияти борлигини билдирди. Унинг айтишича, Пентагон ва бошқа идораларга ушбу мавзудаги материалларни босқичма-босқич аниқлаб, махфийликдан чиқариш ва жамоатчиликка тақдим этиш вазифаси қўйилади.
Трамп бу масалани Truth Social’да ҳам кўтариб, эҳтимолий махфийлаштиришни бекор қилиш жараёнини “жуда мураккаб, лекин жуда қизиқарли ва муҳим” деб атаган. Асосий сабаб сифатида эса жамоатчиликдаги улкан қизиқишни келтирган. Қисқаси, “ҳамма сўрайди, демак кўрамиз” деган кайфият.
Бу мавзудаги шов-шувнинг алангаланишига яна бир омил туртки бўлди. 15 февраль куни собиқ президент Барак Обама интервью/подкастда коинот улкан бўлгани учун қаердадир ҳаёт бўлиши эҳтимоли юқори эканини айтган, шу билан бирга ҳазил аралаш тарзда президентлиги даврида “биз билан алоқа бўлган”ига оид далил кўрмаганини ҳам қўшимча қилган. Кейинчалик у шу гаплар вирусдек тарқалганидан сўнг, “ерга келиб қолишганига далил кўрмаганман” деган маънода аниқроқ тушунтириш ҳам берган.
19 февраль куни эса Трамп журналистлар билан мулоқотда Обаманинг шу фикрларини “махфий маълумотларни ошкор қилди” деб баҳолади ва “бу ҳақда гапириш шарт эмас эди” мазмунида танқид қилди. Яъни, Трампнинг позициясида Обаманинг оддий эҳтимол ҳақидаги гапи ҳам “сир” билан боғланяпти.
Ҳозирча Пентагон ёки бошқа расмий идоралар ҳужжатлар қачон, қай тартибда ва қай даражада эълон қилиниши бўйича аниқ тақвимни очиқламаган. Шунинг учун яқин кунларда энг муҳим нуқта — гап шунчаки баёнотми ёки реал механизм ишга тушадими, деган савол бўлади.
Эътиборли жиҳати: агар ҳақиқатдан ҳам катта ҳажмда материал очилса, бу НУЖ мавзусини янада “поп” қилиши аниқ. Лекин мухлислар (ва конспирологияни ёқтирадиганлар) учун битта совуқ ҳақиқат ҳам бор: охирги йиллардаги расмий таҳлилларда НУЖ деб қайд этилган ҳолатларнинг катта қисмига дрон, шар, оптик иллюзия каби тушунтиришлар берилган, “ердан ташқари” деган қатъий исбот эса ҳали ҳам йўқ. Демак, интрига бор, аммо финал спойлерсиз — ҳозирча.