Наманганда боғчада қизча кўзига қалам санчилиб, оғир жароҳат олди
Наманган вилоятидаги боғчалардан бирида кўнгилни хира қиладиган ҳодиса рўй берди. Ижтимоий тармоқларда уч ёшли қизчани кўзига қалам санчилиб кетгани акс этган видео тарқалди. “Миллий” телеканали хабарига кўра, воқеа Чортоқ туманидаги 20-сонли боғчада содир бўлган.
Маълум бўлишича, болажон югуриб кетаётган пайтда мувозанатини йўқотиб йиқилган ва қўлидаги қалам кўзига кириб кетган. Ҳодисадан сўнг тарбиячилар дарҳол қизчани шифохонага олиб борган.
Шифокор Бобур Хўжаев телеканалга берган интервьюсида бемор шифохонага оғир ҳолатда қабул қилинганини маълум қилди.
“Беморнинг ўнг кўзига қалам кирган. Шошилинч тиббий ёрдам кўрсатилди, ҳозирда реанимация ва интенсив муолажалар олиб борилмоқда. Умумий ҳолати барқарор оғир даражада, қизалоқ ҳушида”, дея таъкидлаган шифокор.
Айни пайтда қизчанинг кўриш қобилияти сақлаб қолингани айтилмоқда. Тиббиёт ходимлари унинг тез орада тўлиқроқ соғайиб кетишига умид билдирмоқда.