Хитойнинг ихчам микротўлқин қуроли Starlink'ка чиндан хавф соладими?
Хитойлик олимлар паст орбитада ишлайдиган сунъий йўлдошлар фаолиятига, жумладан, Starlink тизимига таъсир кўрсатиши мумкин бўлган ихчам микротўлқинли қурилмани тақдим этгани ҳақида хабарлар тарқалди. Бу ҳақда South China Morning Post нашри ёзгани айтилмоқда, мавзудаги маълумотлар ижтимоий тармоқларда ҳам кенг муҳокама қилинмоқда.
Маълум қилинишича, Сиан шаҳридаги Шимоли-ғарбий ядро технологиялари институтида ишлаб чиқилган тизим TPG1000Cs деб номланади ва айрим мутахассислар уни шов-шувли тарзда “Starlink қотили” сифатида таърифламоқда. Қурилма юқори қувватли микротўлқин (HPM) технологиясига таянади: у 60 сония давомида 20 ГВтгача бўлган импулслар чиқара олиши қайд этилган. Яъни, назарий жиҳатдан, паст орбитадаги алоқа ва кузатув йўлдошлари ишида жиддий узилишлар келтириб чиқариш эҳтимоли бор.
Хабарларда келтирилишича, экспертлар паст орбитада ишлайдиган Starlink йўлдошлари фаолиятини сезиларли бузиш ёки зарар етказиш учун 1 ГВт атрофидаги қувват ҳам етарли бўлиши мумкин, янги қурилманинг кўрсаткичи эса бундан бир неча карра юқори. Унинг ўлчами ҳам диққатга сазовор: узунлиги тахминан 4 метр, оғирлиги эса 5 тонна атрофида. Шу сабабли, тизимни юк машинасига, ҳарбий кемага, самолётга, ҳатто муайян платформаларда сунъий йўлдошга ҳам жойлаш мумкинлиги тилга олинади.
Эътиборли томони — аввалги шунга ўхшаш микротўлқин тизимлари, одатда, узлуксиз 3 сониядан ортиқ ишлай олмагани ва анча йирик-дағал бўлгани айтиляпти. TPG1000Cs эса бир сеансда бир неча мингта юқори энергияли импулс беришга қодирлиги ҳамда узоқ давом этган синовларда барқарорлигини кўрсатгани таъкидланади.
Қисқаси, гап оддий “шов-шув” эмас — бу тренд: космосдаги инфратузилма (алоқа, навигация, интернет) кучайган сари, уни “ўчириш”га қаратилган технологиялар ҳам тезлашяпти. Фан тараққиёти, лекин сюжет сал “киберпанк”.