Грентем сунъий интеллект бозорида классик пуфак аломатларини кўрмоқда

GMO инвестиция компанияси ҳаммуассиси ва бозордаги «пуфак»ларни эрта пайқаши билан танилган Жереми Грентем сунъий интеллект (СИ) атрофидаги шов-шув классик бозор пуфаги белгиларини олаётгани, у катта эҳтимол билан оғриқли коррекция билан якунланишини айтди. У бу фикрларини Bloomberg'нинг Merryn Talks Money подкастида билдириб ўтди.

Грентемнинг таъкидлашича, СИ ҳақиқатан ҳам иқтисодиёт ва бизнесни тубдан ўзгартириши мумкин, бироқ молиявий бозорлар яна таниш сценарийни такрорламоқда: инвесторлар кутган натижалар ва активлар баҳоси технологиянинг реал иқтисодий таъсиридан анча илгарилаб кетган. У бунга ўхшаш ҳолат XIX асрдаги темир йўллар «буми» ва 1990-йиллар охиридаги интернет даврида ҳам кузатилганини эслатди.

Инвестор узоқ муддатда энг ишончли ёндашув сифатида арзон баҳоланган активларни сотиб олиш стратегиясини кўрсатди. Унинг фикрича, бозорда машҳур бўлган кўплаб «премиум»лар, жумладан кичик капиталлашув эффекти ҳам, охир-оқибат, бир тамойилга бориб тақалади: қадрсизланган қимматли қоғозни олиш ва қимматлашганини сотиш.

Грентем, шунингдек, АҚШ фонд бозори ҳозирда ортиқча баҳоланган кўринишда эканини қайд этди. Ўсиш СИга йўналтирилган йирик сармоялар ҳамда инвесторларнинг «ҳайвоний инстинктлар»и кучайгани ҳисобига қўллаб-қувватланаётгани айтилади, бироқ бугун нархлар қанчалик баланд бўлса, келажакдаги потенциал даромад шунчалик паст бўлиши мумкин.

Шу билан бирга, у инвесторларни АҚШ бозоридан бутунлай чиқиб кетишга чақирмайди. Энг жозибадор имкониятларни Грентем оммавий савдодаги компаниялардан кўра, венчур сармоялар ва стартаплар сегментида кўрмоқда: у ерда СИнинг ҳақиқий салоҳияти баҳоларда ҳали тўлиқ акс этиб улгурмаган.

Грентем ушбу қарашларини бозорлардаги қисқа муддатли фикрлаш шароитида узоқ муддатли инвестиция хавфларига бағишланган The Making of a Permabear: The Perils of Long-Term Investing in a Short-Term World китобида батафсил ёритган.