Шавкат Мирзиёевга аҳоли рўйхатга олишнинг дастлабки натижалари ҳақида ахборот берилди
19 январ куни Президент Шавкат Мирзиёевга мамлакат бўйича умумхалқ аҳоли ва қишлоқ хўжалиги рўйхатга олиш ишларини ташкил этиш ҳамда ўтказиш жараёни юзасидан ҳисобот тақдим этилди. Таъкидланишича, бу тадбир Ўзбекистон учун тарихий аҳамиятга эга: охирги марта бундай кенг қамровли ҳисоб 1989 йилда ўтказилган. Бу ҳақда podrobno.uz хабар беради.
Рўйхатга олиш 15 январда бошланган бўлиб, жорий йил 28 февралга қадар давом этади. Фуқароларга қулайлик яратиш ва маълумотлар аниқлигини ошириш мақсадида жараён икки босқичга бўлинган. 31 январгача давом этадиган биринчи босқичда аҳоли census.stat.uz портали орқали OneID идентификация тизими ёрдамида онлайн тарзда мустақил рўйхатдан ўтиши мумкин.
Иккинчи босқич 4 февралдан бошланиб, ой охиригача давом этади. Бу даврда “маҳаллий еттилик” вакиллари уйма-уй юриб сўровларни ўтказади. Жорий кампаниянинг муҳим жиҳати — қоғоз бланкалардан тўлиқ воз кечилгани: анкеталар махсус планшетларда тўлдирилади, жараён эса геоинформацион тизим орқали реал вақт режимида назорат қилинади. Шу мақсадда 7 миллион 600 мингдан ортиқ хонадоннинг геолокацияси рақамлаштирилган.
Ҳозирга қадар онлайн портал орқали 2 миллион 480 минг хонадон, шунингдек 31 минг фермер хўжалиги ҳамда агро корхона рўйхатдан ўтказилгани маълум қилинди. Ишларга республика бўйлаб 222 та штаб жалб этилган, қарийб 60 минг ходим тайёрланган, улар орасида олий таълим муассасаларидан 3200 нафар кўнгилли ҳам бор.
Президент рўйхатга олиш давлат режалаштируви учун энг муҳим воситалардан бири эканини қайд этди. Аниқ демографик кўрсаткичлар, миграция ва бандлик бўйича маълумотлар, шунингдек ер ресурслари ва чорвачилик ҳолати ҳақидаги таҳлиллар бюджет маблағларини самарали тақсимлаш ҳамда ҳудудлар ривожи стратегиясини узоқ муддатга белгилашга хизмат қилиши таъкидланди.
Шунингдек, шахсий маълумотлар махфийлиги тўлиқ кафолатланиши билдирилди: барча ахборот қонун билан ҳимояланган ва фақат умумлаштирилган кўринишда статистик мақсадларда ишлатилади. Рўйхатга олиш якунида мамлакат бўйича ягона маълумотлар базаси шакллантирилиб, у жамиятнинг реал ижтимоий-иқтисодий манзарасини акс эттиради.