Մակրոնը պատրաստվում է դիմել ԵՄ հակաճնշման մեխանիզմի գործարկմանը՝ ԱՄՆ նոր մաքսատուրքերի դեպքում
Ֆրանսիայի նախագահ Էմանուել Մակրոնը հայտարարել է, որ ԱՄՆ-ի կողմից հնարավոր նոր մաքսատուրքերի սահմանման դեպքում Ֆրանսիան կպահանջի գործարկել Եվրամիության «հակաճնշման գործիքը» (anti-coercion instrument)՝ եվրոպական շահերը պաշտպանելու համար։
Ինչպես հայտնում է Le Figaro-ն, Մակրոնի այս հայտարարությունը հնչել է այն բանից հետո, երբ ԱՄՆ նախագահ Դոնալդ Թրամփը սպառնացել է ութ երկրներին, այդ թվում՝ Ֆրանսիային, Գերմանիային և Մեծ Բրիտանիային, մաքսատուրքեր սահմանել՝ Գրենլանդիայի նկատմամբ վերահսկողություն հաստատելու իր փորձերին հակադրվելու համար։
Եվրամիության ներսում ստեղծված իրավիճակը արդեն արտակարգ քննարկումների պատճառ է դարձել։ Սպասվում է, որ այսօր տեղի կունենա ԵՄ դեսպանների արտակարգ հանդիպում, որի ընթացքում կքննարկվեն Վաշինգտոնի քայլերին հնարավոր համատեղ արձագանքները։
Եվրահանձնաժողովի նախագահ Ուրսուլա ֆոն դեր Լայենը հայտարարել է, որ Եվրոպան «մնալու է միասնական, համակարգված և վճռական»՝ պաշտպանելու իր տնտեսական և քաղաքական շահերը։
Միաժամանակ Նորվեգիան, որը ԵՄ անդամ չէ, սակայն ընդգրկված է Թրամփի սպառնալիքների թիրախում գտնվող երկրների թվում, առայժմ չի նախատեսում պատասխան քայլեր ձեռնարկել։ Նորվեգիայի վարչապետ Յոնաս Գար Ստյորեն հայտարարել է, որ անհրաժեշտ է խուսափել առևտրային պատերազմի սրացումից։
«Մենք պետք է շատ զգույշ լինենք, որպեսզի չմտնենք անվերահսկելի առևտրային պատերազմի մեջ։ Դրանից ոչ ոք չի շահում»,- ասել է նա NRK հեռուստաընկերությանը՝ հավելելով, որ այս պահին Նորվեգիան հակաքայլեր չի քննարկում։
The post Մակրոնը պատրաստվում է դիմել ԵՄ հակաճնշման մեխանիզմի գործարկմանը՝ ԱՄՆ նոր մաքսատուրքերի դեպքում first appeared on MediaLab Newsroom-Laboratory.