Майя Санду: референдум бўлса, Руминияга қўшилишни танлайман

Молдова президенти Майя Санду референдум ўтказилса, ўз мамлакати Руминия билан бирлашиши учун овоз беришга тайёр эканини айтди. Руминия — НАТО ва Европа Иттифоқи аъзоси, Санду эса бу йўлни Молдовани ташқи босимлардан ҳимоя қилишнинг эҳтимолий кафолати сифатида кўряпти. У бу ҳақда Британиядаги The Rest Is Politics подкастига берган интервюсида гапирди.

Давлат раҳбарининг таъкидлашича, ҳозирги геосиёсий муҳитда Молдова каби кичик давлат учун демократия ва суверенитетни сақлаб қолиш янада қийинлашиб бормоқда. Санду аввал ҳам бир неча бор Москва томонидан мамлакат ички сиёсатига аралашиш уринишлари бўлаётганини билдирган ва бу хавотирларини яна бир бор такрорлаган.

Шу билан бирга, реал кайфиятлар ҳам бор. Reuters маълумотларига кўра, 2,4 миллион аҳолиси бор Молдованинг тахминан 1,5 миллион кишиси Руминия фуқаролигига эга. Аммо сўровларда мамлакат аҳолисининг фақат тахминан учдан бири бирлашиш ғоясини қўллаб-қувватлаши қайд этилган.

Санду ҳам буни яширмади: у ҳозирча жамоатчиликда ушбу ташаббусни тўлиқ қўллайдиган кўпчилик йўқлигини тушунишини айтган. Шу сабаб, унинг фикрича, Европа Иттифоқига қўшилиш — анча “реалистик” сценарий. Молдова ҳукумати эса мамлакатни 2030 йилгача ЕИга олиб кириш мақсадини олдинга қўйган, лекин бу йўлда Кишинёвни оғир ислоҳотлар ва сиёсий қаршиликлар кутиб турибди.

Қисқаси, Санду айтган гап — “эртага бирлашамиз” дегани эмас, балки Молдованинг хавфсизлик ва келажак танловлари қанчалик кескинлашганини кўрсатади. Сиёсатда шундай: баъзан бир оғиз гап бутун минтақани “уйғотиб” юборади.