АҚШ Гренландияни “пул билан сотиб олиш”ни режалаштирмоқда
АҚШ маъмурияти Гренландия масаласида янги ташаббусларни муҳокама қилмоқда. Reuters манбаларига кўра, Оқ уйда Гренландия аҳолисига бир марталик пул тўловлари бериш орқали уларни Даниядан ажралиб чиқишга ва келгусида АҚШ билан яқинлашишга кўндириш имконияти кўриб чиқилмоқда. Таклиф қилинаётган суммалар бир киши учун 10 минг доллардан 100 минг долларгача бўлиши мумкин.
Гренландия Даниянинг автоном ҳудуди ҳисобланади ва Дания ҳамда Гренландия расмийлари орол сотилмаслигини қатъий таъкидлаб келмоқда. Европанинг етакчи давлатлари ҳам Дания позициясини қўллаб-қувватлаб, Гренландиянинг келажаги фақат Гренландия ва Дания томонидан ҳал қилиниши кераклигини билдирди. Бу масала НАТО иттифоқчилари ўртасида ҳам кескин мунозараларга сабаб бўлмоқда.
АҚШ президенти Доналд Трамп Гренландияни миллий хавфсизлик ва стратегик ресурслар нуқтаи назаридан муҳим ҳудуд деб ҳисоблайди. Оқ уй вакиллари Гренландияни АҚШ билан боғлашнинг турли йўлларини, жумладан дипломатик келишувлар ва махсус ҳамкорлик битимларини муҳокама қилаётганини маълум қилди. Шу билан бирга, Дания томони билан расмий музокаралар ўтказилиши режалаштирилган.
Гренландияда мустақиллик масаласи узоқ йиллардан бери муҳокама қилиниб келинмоқда. Аҳолининг катта қисми Даниядан ажралиш тарафдори бўлса-да, иқтисодий барқарорлик ва ижтимоий масалалар сабаб ҳозирча референдум ўтказилмаган. Сўровлар эса гренландияликларнинг аксарияти АҚШ таркибига қўшилиш ғоясини қўллаб-қувватламаслигини кўрсатмоқда.