Жо Байден оладиган йиллик нафақа миқдори очиқланди
АҚШнинг собиқ президенти Жо Байден ҳар йили тахминан 417 минг доллар миқдорида нафақа олади. Бу ҳақда The New York Post нашри хабар берди.
Манбага кўра, Байденга тўланадиган нафақа унинг президентлик давридаги расмий маошидан ҳам юқори. Шунингдек, ушбу сумма Барак Обама оладиган нафақадан қарийб икки баробар кўп экани қайд этилган. Маълум қилинишича, Байденнинг нафақаси президент сифатида олган йиллик маошидан 17 минг долларга ортиқ.
Мақолада таъкидланишича, собиқ президентга белгиланган юқори нафақа унинг кўп йиллик сиёсий фаолияти билан боғлиқ. Хусусан, у истеъфога чиққанидан кейин илк йилданоқ икки хил давлат пенсия жамғармасидан тўлов олиш ҳуқуқига эга. Солиқ тўловчиларни ҳимоя қилиш миллий жамғармаси вице-президенти Демиан Бредининг сўзларига кўра, Байден ўзининг сиёсий фаолияти туфайли “ноёб мақом”га эга ҳисобланади.
Маълумот учун, Жо Байден ўз фаолияти давомида сенатор, вице-президент ҳамда президент лавозимларида ишлаган бўлиб, айнан шу тажриба унинг нафақа миқдори шаклланишида муҳим омил сифатида баҳоланмоқда.