Hades II 2025 йилнинг энг юқори баҳоланган ПК ўйини бўлди
2026 йил 6 январ куни эълон қилинган рейтингга кўра, Hades II 2025 йилда ПК платформасида чиққан энг юқори баҳоланган ўйин сифатида биринчи ўринни эгаллади. Ўйин 95 балл тўплаб, “Йил ўйини” деб топилган. Бу ҳақда kursiv.uz хабар беради.
Рўйхатга фақат ихтисослашган нашрлардан камида еттита тақриз олган релизлар киритилган. Hades II нафақат Metacriticда, балки OpenCriticда ҳам йилнинг янги ўйинлари орасида энг юқори натижани қайд этган.
Иккинчи поғонадан Blue Prince (92 балл) жой олган бўлса, учинчи ўринни Clair Obscur: Expedition 33 (91 балл) эгаллади. Кучли бешликка Hollow Knight: Silksong ва Split Fiction ҳам кириб, ҳар икки лойиҳа 90 баллдан баҳоланган.
Top-10 рўйхатидан PlayStation 5 платформасидан кўчирилган йирик портлар ҳам ўрин олди — Final Fantasy VII Rebirth ва The Last of Us Part II Remastered. Kingdom Come: Deliverance II 89 балл билан 12-ўринга жойлашган, ундан кейинги қаторни эса Monster Hunter Wilds 88 балл билан эгаллаган.